India ramah darkar 24 liam ta chhungin coronavirus kai mi 7,231 hmuh chhuah leh hman niin mi 4,44,28,393-in an kai tawh.
Union health ministry-in a chhinchhiah dan chuan hri kai enkawl lai tlahniam zelin mi 64,667 an la awm mek.
Darkar 24 liam ta chhung hian mi 45-in an thihpui leh hman a, mi 5,27,874-in an thihpui ta a. Covid-19 thihpui chhinchhiah thar zinga mi 10 hi a hma lama thi tawh, Kerala-a chhinchhiahnaa telh thar an ni.
Hri kai hmuh chhuah tawh zawng zawng zat atanga chhutin enkawl lai hi 0.15% an la ni mek a, 98.67% erawh enkawl dam tawh an ni tih ministry chuan a sawi.
Darkar 24 liam ta chhungin a kai hmuh thar aia enkawl dam an tam zawk avangin enkawl lai hi mi 1,065-in an tlahniam leh hman a ni.
Darkar 24 liam ta chhunga sample endik zinga 2.05% chuan hri an kai tih hmuh chhuah a ni a, chawlhkar khat liam ta chhunga endik zinga 2.55%-in an kai tih hmuh chhuah a ni bawk.
Hri kai hmuh tawh zawng zawng zinga mi 4,38,35,852 chu enkawl dam leh tawh niin 1.19%-in an thihpui.
Invenna pek beihpui thlak kal mek zel pawh chak taka hma lak zel a ni a, vaccine dose vaibelchhe 212.39 chuang pek a ni tawh tih ministry chuan a sawi.