Grape atanga wine siam hralh leh siamchhuah phal a ni ta
Council of Minister chuan Mizoram tharchhuah ngei Grape atanga wine siam leh hralhchhuah an phal ta a, hei hi a kawng hmang tur dik tak pawh niin a lang a, a lawmawm hle.
Zu leh a kaihhnawih kan khap a, a lawmawm. Mahse, kan ram tharchhuah leh hmalakna tam tak awm tawh, kohhran thenkhat phei chuan sacramental wine atana hman tura inremna an lo neihpui hial tawh grape atanga wine siam kan han khap tel ve ngawt hi chu a kawng hmang lo hle in a hriat a, chutah kan la mansak duh hial bawk a nih kha!
Hetihlai hian dan hnuaia grape wine zawrh phal a nih takah chuan excise force-ten May 27, 2022-a Millenium Centre-a an man chu pek let an ni dawn em tih zawhna chu chhangin, excise minister chuan, “Kha kha chu tuna MLP Act ang khan kan la kalpui ang,” a ti thung!
Kan ram tharchhuah leh sorkar pawhin sum tam tak senga hma a lo lak tawhna grape siam leh zawrhchhuah chungchanga khapna kan lo siam thar veleh ngawt kha thil kawng hmang lo tak mai a ni a, tuna a phuarna phelh a ni ta hi lawmawm tak a ni.
Kan ram siamchhuah leh dawmkanna tur kawngah hi chuan sorkar hian thiang lo hi nei vak lo tawh bawk teh se.