HDFC Bank-in an Corporate Social Responsibility (CSR) programme, Parivartan kaltlanga Civil Hospital, Aizawl hnena ICU khum 10 leh hemiin a ken tel hmanraw chi hrang hrang Rs. nuai 70 chuang hu an hlan chu nimin khan Health Minister Dr R Lalthangliana’n a hawng.
He hun puala inkhawm, Doctors’ Seminar Room, Civil hospital, Aizawl-a neihah health minister chuan HDFC Bank-in Civil Hospital, Aizawla ICU khum 10 leh mamawh dang hmanraw pawimawh tak tak an pek bakah Lunglei Civil Hospital leh Siaha District Hospital tan motorised ICU khum panga leh hmaraw pawimawh eng emaw zat an hlan tawh tih a sawi a, district danga hospital-te tihchangtlunna tura hma lak dan kawng ngaihtuahsak leh turin HDFC hotute a ngen.
Dr Thangtea chuan Civil Hospital, Aizawl chu Mizoram hmun kil tin atanga pan a nih thu sawiin, a bik takin private damdawi ina inenkawl ve thei lo mi harsa zawkten an pan nasa lehzual a, heng an thil neih tharte pawh hi tangkai takin an hmang ngei dawn tiin, hei hian damdawi ina thawktute pawh phurna a pe ngai dawn tih a sawi.
HDFC bank-in nimina Civil Hospital, Aizawla an thil hlan hi ICU khum 10 bakah a ken tel ventilator, oxygen cylinder, ECG khawl, infusion pump leh thil dang dang, a vaiin khum pakhat tan hmanraw chi hrang hrang 17 theuh a ni.
ICU, khum hlanna pual inkhawm hi Dr Zoramthanga, Medical Superintendent, Civil Hospital, Aizawl-in a kaihruai a, Health & Family Welfare Board Vice-Chairman Dr ZR Thiamsanga, MLA leh HDFC bank aiawhin ten thu an sawi a ni.