Aizawl : Minister Lalchamliana chuan nimin khan Serchhip DC Conference Hall-ah Sorkar Flagship Programme SEDP Family Oriented chu Serchhip district tan a hawng.
Lalchamliana chuan, SEDP tanpuina a thawhkhatna atana Rs. 25,000 an sem mek chu Line Department ten September leh October inkarah an sem zawh hman an beisei tih a sawi a, kumin December leh nakkum January chhovah a thawh hnihna Rs. 25,000 dang pek leh hman tum a nih thu a sawi.
Tuna Family Oriented SEDP-a Rs. 50,000 sema bul an tan chu an duhkawpa tam a ni rih bik lova, sum leh pai an neih milin an kalpui rih mai zawk tih a sawi a,”Hei aia tam hi sem theih kan duh,” a ti.
Kut hnathawktute khai chhuaha, dinhmun duhawm zawka chawisan chu sorkar chuan mutmawh hnarmawh ah a nei tih sawiin, sorkarin tanpuina a pek chu diklo taka hmangin, a nih dan tur angin an kalpui lovang tih an hlau hle tih a sawi bawk.
Serchhip district tana Family Oriented SEDP hawnna hun hi SEDP District Level Committee Member Secretary Malsawmtluanga, Project Director, DRDA chuan a kaihruaia, district bawrhsap Nazuk Kumar-i’n thu a sawi.
Serchhip district chhungah hian MLA bial 3 awmah chhungkaw 4,500 in SEDP an dawng dawn a ni.