Vawiin atanga The Motor Vehicle (Amendment) Act, 2019 hman tan a ni dawn avanga lirthei khu endiktir tura inhnawhkhawmna thleng mek sutkian nan Mizoram sorkarin lirthei khu endik tura kal lirtheite chu September thla chhung ngaihhnathiamna a pe dawn.
Lirthei dan bawhchiate hremna na zawk pekna tur dan hman tan tur chungchang leh he dan hman turin lirthei khu endik a nghawng dan chungchang sawihoin Transport Minister TJ Lalnuntluanga pisaah transport director, Traffic SP leh Mizoram Pollution Control Board member secretary te chu nimin khan an thukhawm.
An thurel chungchanga The Zozam Times zawhna chhangin transport minister chuan Aizawl-a Pollution Testing Centre hmun thum – MINECO, Zembawk leh Bawngkawnah lirthei a tam thei ang ber endik zel turin hmalak nise an tih thu sawiin, tun dinhmunah lirthei khu endiktir tum inhnawhkhawmna nasa lutuk sutkianna turin lirthei khu endik tura kal lirtheite chu September thla chhung ngaihhnathiamna pek an rem tih thu a sawi.
Lirthei khu endik turte bik chu ngaihhnathiamna pe dawn mah se document dangte chu endik fel zel a ni dawn a, hmun danga an kal chuan hriatthiamna a awm thei dawn chuang lo tih transport minister chuan a sawi.
Transport minister chuan tunlai hian kumtlingloa lirthei khalh chhuak an awm thin thu leh bike silencer tichhiaa a ri ring chi vuah an awm thin thu sawiin, dan pela khawsate chu um zui zel an tum tawh thu a sawi a, mipuite chu theihtawp chhuah Zoram hi chenna nuama siam tura tan la turin a ngen tih a sawi bawk a ni.