Aizawl : MPCC General Secretary H Rohluna chuan Congress President Lalsawta hoa sorkar tha siam hi mipuiin an nghakhlel tih a sawi.
Kolasib Taitesena Hall-a party workers meet hmanpuitu H Rohluna chuan, “Kan ram sum leh pai dinhmun tlachhe sawp mek siam tha tur leh mipui huapzo sorkar siam turin MPCC President Pu Lalsawta hi an ring tawk a, Mizo mipui a hrechiang apiang ten Pu Lalsawta hoa sorkar tha siam hi min duhpuiin an nghakhlel em em a ni,” a ti.
Minister hlui H Rohluna hian MNF sorkar chu Congress sorkar hmasak lai pawha Mizoram lei ba thanga awh tirtu a ni a, chu leiba laka Zoram mipuite chhanchhuaktu chu tuna MPCC President leh an Chief Ministerial Candidate Lalsawta a nih thu a sawi a. MNF chhinchhiahna hi Arsi a nih angin khawthimah a eng a lang chiang thin ang hian, a en apiangin Mizoram hi thimin a tlak buak zel niin a sawi.
ZPM party chungchang pawh sawiin H Rohluna hian, “ZPM te hi pawl hrang hrang awm khawm an ni a, bel keh phuarkhawm tui pai thei lo ang an ni. Anmahni party chhungah hian an la buai tawk em em rih a, mahni party chhungkua pawh chingfel thei lote hi Mizoram kaihruai tur khawpin mipui te’n an la ring tawk lo a ni,” a ti.
He hun hi Kolasib Block President Lalchanhlua Pachuau in a kaihruai a ni.