- Joseph L. Ralte
Thlai thar hralh te, a process thute kan khel luih luih a. A bul ber chu Agri Produces Marketing Regulations kan nei lo hi a ni zel mai. Hei hi a hmanhmawh thlak ber zawk a ni. Sumdawnna mumal tak, thianghlim tak, kalkawng awmze nei taka eco-system siam tur chuan sorkarin dan leh dun a siam hmasak a ngai. Eng ang pawhin sorkar hausa leh kut hnathawkte lamtang sorkar pawh nei ila, sorkarin hna a thawh dan tur ruangam leh a player te venghimtu dan leh dun a awm loh chuan sorkar a che a thei ngai lo ang.
Sumdawnna thiam lohna hmun apiangah ram a rethei. Kan awh em em ramho hi awmze nei, dan hnuaia sumdawnna a kal theih nana dan leh dun mumal tak nei vek an lo ni a. American dream te hi Japanese hovin “Japanese i nih chuan i rethei thiang lo” an lo tih thin thuamchakna tho kha a ni.
Silicon Valley eco-system angte khu khawvel thluak tha hovin an pan khawmna chhan chu a player te vengtu dan leh hrai that em em vang a ni. Mizote pawh sumdawn thiam loh vang ngawr ngawr piah lamah agripreneur te venghimtu dan leh dun kan neih loh avangin kan ropui thei lo a nih ber hi maw??
Kan sorkar engine hrawn tawhho hi a model a hlui lutuk tawh a. A mechanical lutuk a, engine hi down ila. Micro-chips based engine vuah ila. A body te hi denting ti ila, rawng thar hlak, 2k matt finish ngatin paint ila. A ke-ah pawh hian michelin emaw yakohama ngat hmang tawh ila. Petrol leh diesel heh lo takin, insawh boh boh lovin kan tum ramah min thlen zung zung mai ang.
A la sorkar ve lo ber party hotute lah chuan “Kan flagship policy chu mipuite an ni,” an la ti ta deuh deuh a. A buk thelhin kan la thelh zel zawng a nih hi maw?? Flagship policy awmzia pawh zir that leh a ngai hlawm a nih hi. A rorelna fung ber vuantu lah chuan tlawmngai pawlte hnenah a hnuaia thawkte lo vilzui turin ala ngen ta deuh deuh.
A kalkawng kan tihfuh hun hunah kan kang zawt mai ang.