Manipur Chief Minister N Biren Singh chuan nimin khan Regional Institute of Medical Science (RIMS)-ah video conference hmangin Level 1 Trauma care centre a hawng.
Centre thar hi ‘capacity building for developing trauma care facilities on National Highways’ kalpui mekna chi khat atana hawn a ni.
Centre dinin a tum ber chu kawngpuia lirtheia chetsualnaa thihna thleng thin tam tak, inven theihte invenna tura puih a ni a. India trauma care network hi kawngpui lian dungah km 100 huap chin dan zelah din tum a ni.
Chief minister chuan RIMS thuneitute hnenah hetiang Trauma Care Centre din a nih theih nana an inpekna a fak a. Trauma Centre-ah hian ICU khum, HCU khum, damlo nawrna, inzaina hmun, CT-Scan tihna khawl, kalthuah theihna khawl leh mamawh dang a awm bawk ang tih a sawi.
Manipur chief minister chuan an state chuan state dangte ngaihtuahin doctor thiam leh tawnhriat nei tha an ngah zawk hle niin a sawi bawk.
State sorkar chuan coronavirus hripui a len mek laia mahni intheihnghilha an hna rinawm taka thawktu doctor, nurse leh damdawi lama thawktute chu an inpekna a hre reng tih a sawi.
Hriselna lama thawktute inpekna avang hian an state chuan hripui hi an kal pelh tep tawh a beisei thu leh mipuite hnena zirtirna pek that chu hri leng dona atana pawimawh a nih thu a sawi bawk.