Aizawl : BJP Mizoram Pradesh chuan chief minister Zoramthanga kaihhruai MNF sorkar chu SEDP Rs 25,000 an sem turah a aia tlema tawlh tawh lo turin an ngen.
Nimina an thuchhuahah BJP Mizoram Pradesh hian, MNF sorkarin SEDP an sem turin cheng nuai thum atanga Rs 50,000-ah an tlak thlak hnuah, Rs 25,000-a an tla thla leh chu mahni thu tiama rinawm lo, ram hruaitute chet dan a nih thu sawiin, hei aia tlem chuan tawlh tawh lo turin an ngen tih an sawi.
BJP Mizoram hian Mizoramin sum leh paiah harsatna tam tak a tawk mek a, Mizoram sorkar hian sum chungchanga harsatna a tawhna hi mipui hnen atanga phuhrukna tur zawn tum lo tur leh sorkar retheih avanga Mizoram mipui tawrhna leh harsatna tawhna te hrethiam turin an ngen a. Mipui hnena an intiam ang pawisa pawh vehthlem kual tawh lo a, sem mai turin an ngen tih an sawi bawk.