United Nations chuan ruah sur nasa tak leh tui lian rapthlak tak tuar, Pakistan tan tanpuina $ maktaduai 160 zet pek turin a ngensak.
Pakistan hian ruah sur leh tui lian a tawrhah hian mi 1,100 chuang thi tawhin mi maktaduai 33 velin an tuar mek a; in, sumdawnna, hmun leh thlai tam tak a chhia.
Hmar lam tlangrama ruah nasa tak surin tui hi nasa taka tilianin in leh lei a tichhiat bakah kawngpui leh thlai tam tak a hnawl.
An ram lailia Indus luia tui tam tam luang chuan chuan chhim lam phaizawl a thleng a, a thlen chin apianga tui lian rapthlak tak a siam.
“Pakistan chu hrehawm nasa takin a tuam mek,” tiin UN Secretary-General Antonio Guterres chuan Thawhlehnia video message a tihchhuaha Islamabad tan a ngensak.
“Pakistani mipuiten furpui an tuar a, ruah leh tui lian manganthlak takin a tuam mek,” tiin Guterres chuan a sawi.
Pakistan chuan tui lian hi mi maktaduai 33 chuangin an buai phah mek niin a sawi a, hei hi an rama mihring cheng mi maktaduai 220 atanga 15% vel an ni.
UN chief chuan an ram hian khawvel thawhhona a mamawh bakah ngaih pawimawh an tul hle tih a sawi.
Guterres chuan Pakistan thil tawn mek chu ram dang tan pawh sik leh sa inthlak meka hmalak a tulzia lantirtu a nih thu a sawi bawk.
“Sik leh sa inthlakin kan khawvel a palzut mek hi kan tihtawp a ngai,” a ti a. “Vawiinah Pakistan-ah a thleng a, naktukah chuan kan ramah a ni thei,” a ti.
Khawchin zirtute chuan chawlhkar dang pawh ruah tam zawk a la sur dawn niin an la sawi lawk bawk.
Pakistan hmar lamah khualzin thenkhat telin mi 300 dawn tangkhang chu chhanchhuah an ni tih sorkar hnuaia disaster management agency chuan a sawi a. Hmarthlang lamah mi 50,000 chuang zet sorkarin tawmna tur a siam pahnihah dan an ni a. Kawngpui hrulah puan in kaiha khawsa tam tak an awm bawk.
Puih hmanhmawhthlak
Pakistani sorkar chuan tui lianin thil a tihchhiate hi $ tluklehdingawn 10 chuang man a nih thu leh mihring siam chawp sik leh sa inthlak nasa a tawrh avangin puih thuai an ngai hle tih a sawi.
Foreign Minister Bilawal Bhutto-Zardari chuan hmeichhia, naupang leh mipa tam tak khawlaiah ei tur, tui leh damdawi pawh nei lovin an khawsa mek tih a sawi.
“Tawmna tur leh puanin bakah thosilen kan mamawh hmanhmawh hle,” a ti a. Pakistan chuan thil chhia tun din lehna tur pawh an mamawh hle bawk tih a sawi.
Guterres chuan $ maktaduai 160 a ngensak hi mi maktaduai 5.2-te hnena ei tur, tui, intihfaina, zirna leh damdawi lama an hman tur a nih thu a sawi.
Pakistan-a national disaster agency hotu, General Akhtar Nawaz chuan an rama district 160 an neih zinga 72 vel chu chhiatna thlenna hmuna puan a nih thu a sawi.
Thlai chinna hmun acre maktaduai hnih chuang chu tuiin a chim niin a sawi a, ruah chu a tla thin zat pangngai let thum zet niin hmun thenkhatah phei chuan a let ruk pawh a tling niin a sawi.
Pakistani sorkar hi sumah a harsa em em a, tui lian rapthlak tak a tuar zui leh a. Ram hausa leh thil siamna hmun ngahten sik leh sa an tihchhiat nasat chu ram rethei bawkin an tuar na tih lanna pakhata ngaih a ni.