Lirthei dan bawhchiate hremna na zawk pekna tur dan, The Motor Vehicle (Amendment) Act, 2019 chu vawiin atangin Mizoramah hman tan an ni dawn a, dan hman tan a nih hma hauhin nghawng nei nghalin, tunlaiin lirthei document leh driving licence fel lo tihfel tum an tam.
Mizoram sorkara transport department chuan August 22, 2022 khan Motor Vehicle Act siam that chu September 1, 2022 atangin Mizoramah hman tan a nih tur thu a puang a, hemi ni atang hian lirthei khu endiktir an pung a, lirthei document leh driving licence fel lo tihfel tum an pung bawk.
The Zozam Times zawhna chhangin Mizoram Pollution Control Board (MPCB) Member Secretary C Lalduhawma chuan August 22 atang khan Aizawl-a Pollution Testing Centre-te chu pantu an pung zual tih sawiin, a tir lamah chuan centre lian ber, MINECO-ah ni khatah lirthei 100-150 inkar endikin, tun hnuah erawh ni khatah lirthei 300 endik a nih thin thu a sawi.
Lirthei khu endika pollution free certificate la tura intlar an tam tak zel avangin hming ziah luh hun chu zing dar 6 atanga dar 9 thleng an hawn thin thu a sawi a, hetihlai hian MINECO site bikah lirthei khu endiktir tura hming ziak lawk an tam tawh avangin September 1-ah bik chuan hming ziah luh thar a rem tawh lo tiin, “Hming ziak lawk sa ngawt pawh hi Ningania endik zawh loh pawh a awm thei a, booking hi September 2 atangin tihtan leh theih a ni ang,” a ti.
MPCB-in lirthei khu an endik tawh thin dan sawiin, nikum khan Aizawlah lirthei 8,587 endikin, ni tin lirthei 33 endik ziah ang an ni a, Lunglei-ah nikum kumtluanin lirthei 1,161 endik a ni tih leh ni khata chawhruala endik zat chu lirthei pali ang a nih thu a sawi.
A sawi zel danin kumin January atanga July, thla sarih chhungin Aizawl-a centre pathumah lirthei 5,420 endik a ni a, ni khatah chawhruala lirthei 39 endik thin ang a ni a. August 22-30, ni kua chhungin Aizawlah lirthei 4,000 lai an endik der tawh a, chawhrualin ni khatah lirthei 500 endik ang an ni.
Lirthei khu endiktir an tam viau ang bawkin district hrang hranga transport office-ah pawh lirthei document leh driving licence fel lo tihfel tum an thahnem thin hle.
The Zozam Times-in Aizawl District Transport Office, Licensing Authority hotute a kawmnaah driving licence dil thar, licence renew, learner dil thar leh renew an pung hle tih an sawi a, driving licence bikah ni tin a thar dilna 100 chuang an dawng a, licence renew leh dublicate dilna pawh 50 chuang ni tin an dawn thin thu an sawi bakah learner dil thar leh exam an pun hluai thu an sawi DTO chu zing dar 9-ah hawn thin a ni a, lirthei document fel lo tihfel tumte chu zing dar 8 bawr vel atangin DTO-ah hian an awm tan tawh thin tih DTO hotute chuan an sawi a ni.
DTO (Registering) lam hotute pawhin dan thar hman a nih dawn takah chuan lirthei registration thi tawh renew tum an pun thu an sawi bawk a, lirthei registration certificate validity tawp tawhte chu tinung turin hrilh hre thin mah se ngaihsak lo an tam a, tuna dan thar hman a nih dawn takah erawh renew tum leh duplicate certificate lak tum an thahnem hle tih an sawi bawk a ni.