Youth for Environment Justice Mizoram (YEJM)-in NHIDCL chungah hremna lekkawh tura phut nawn lehin, an ngennain awmzia a neih loh chuan lungawi lohna lantir an tum thu forest department hnenah memorandum an theh lut.
Nilaini khan YEJM hian NHIDCL kawng laih chungchanga Principal Chief Conservator of Forest (PCCF)-in NHIDCL-te hnena stay order a pek hnu pawha dik lo taka leivung an la paih chhunzawm te, dan bawhchhiatna la awm reng te leh dan bawhchhetute hrem an nih loh avanga na zawk leh chak zawka hma la turin leh hremna pek tur awmte chu hremna pek ngei phutin, memorandum an theh lut a ni.
YEJM hian Mizoram Pollution Control Board (MPCB)-in environment dan zaha zawm tur leh an zawm loh chuan an chungah hremna lekkawk a nih tur thu lehkha (show cause notice) vawi thum lai an pek tawh hnuah leh DFO tinin stay order pe an pek tawh hnuah pawh, NHIDCL-in ngai pawimawh loin, vawiin thleng an hnathawh an la chhunzawm zel a. Spoil bank tih signboard phuahchawp tak an tar zawng chu stay order an zawm awmchhun a nih thu an sawi.
YEJM hian environment dan zawng zawng bawhchhetute hi hrem an nih ngei an phut thu sawiin, an lehkha theh luh an hmuh atanga chawlhkar khat chhunga PCCF hmalakna a awm lo a nih chuan EF&CC kawtah hma an lak hma chu lungawi lohna lantir an tum tih memorandum-ah an tar lang a ni.