Aizawl : Mizo National Front (MNF) chuan Mizoram sorkar Council of Ministers thukhawmin an thu pawm hrang hrangte chief minister Zoramthanga kaihhruai sorkar chu mipui hmakhawngai tak a nihzia a lang tiin, chhuanawm an tih thu an sawi.
Nimina thuchhuah an siamah MNF party hian, Thawhlehnia council of ministers thukhawmin Mizoram chhunga kut hnathawktute grep thar atanga dan hnuaia wine siam leh hralh phal a ni tur chu, a bik takin Champhai leh Hnahlan grep chingtute’n dan hnuaiah ngei ngaihngam taka an thawhrim rah an seng tur hi an lawmpui thu leh Mizoram economy siamthatu an nih ngei an beisei thu an sawi.
MNF party hian, hun rei tak hlawh pung miah loa thawk tawh Samagra Shiksha hnuaia zirtirtu mi 5000 dawn te dinhmum siam that sak nan DA 15% leh Medical Allowance bakah an thawh rei dan azirin allowance pek sorkarin a remti te, Mizoram Sports Incentive Cash Award Scheme 2022 thar pawm a ni te, Myanmar leh Bangladesh lama insumdawn tawnnate – Zokhawthar, Kawrpuichhuah leh Zorinpui Immigration Check Post-ah Mizoram Police tan post 20 siam belh rem ti a, Home Department hnuaiah vek Head Constable (Operator) post 34 chu MPRO, Mizoram Police hnuaia Assistant Sub Inspector (Operator) a hlankai an pawm te chu lawmawm an tih thu an sawi.
Hei bakah hian Planning & Programme Implementation Department Mizoram Startup Mission (Government Society) din tura rawtna pawm a ni leh Department hrang hranga Contract Employee te hnena 10% Dearness Allowance pek an pawm chu, Mizoram tana tha tur an ngaihtuah kawngah hian Council of Ministers te chhuanawm an tih thu an sawi a ni.