India ramah darkar 24 liam ta chhungin coronavirus kai mi 7,946 hmuh chhuah leh hman a ni a, mi 4,44,36,339-in an kai tawh.
Union health ministry chuan hri kai enkawl mek zat a tlahniam zel tih sawiin mi 62,748 an la awm mek tih a tar lang.
Darkar 24 liam ta chhung hian mi 37-in Covid hi thihpui leh hmanin mi 5,27,911-in an thihpui tawh a, thihpui thar chhinchhiah zinga mi 12 hi Kerala-a a hmaa lo thi tawh, chhinchhiahnaa telh thar an ni.
Hri kai hmuh chhuah tawh zawng zawng atanga chhutin enkawl lai hi 0.14% chauh an ni tawh a, 98.67% chu enkawl dam an ni tawh.
Serum Institute of India chuan Omicron variant bik atana hman tur vaccine chu thla ruk hnuah peih fel a ni dawn tih an CEO Adar Poonawalla chuan Ningani khan a sawi.
Pune-a awm, Serum Institute hi US biotechnology major Novavax nen thawk dunin Omicron bik laka invenna tur hi an buaipui dun a ni.