Aizawl : NEC sum Rs. nuai 466.62 senga sak Lawngtlai-III-a Lai Cultural Centre-cum-Auditorium (LCCA) chu nimin khan Lawngtlai East bialtu MLA H Biakzaua’n a hawng a. Nimin vek khan MLA fund Rs. nuai 4 senga sak Lawngtlai Electric Venga Community health clinic centre a hawng bawk.
Sorkar thuchhuahin a tarlan danin LCCA hi North eastern council (NEC) sum hmanga Mizoram sorkara Art & Culture department enkawlna hnuaia Lushai Engineers, Ramhlun, Aizawl-in an sak a ni a. February 15, 2018 ah a sak hna ṭanin, April 20, 2022 khan zawhfel a ni.
LCCA Lawngtlai East bialtu MLA H. Biakzaua chuan LCCA sa tura hma la hma- satute – bialtu MLA hlui H. Zothangliana, DPR siamtu Lushai engineers, Lawngtlai-III branch YLA, VC leh mimal ṭhahnemngaite hmalakna fakin lawm thu a hrilh a. A puitlinna tura theihtawp chhuahpuitu Mizoram sorkara Art & Culture deptt. official-te leh Lai autonomous district council hotute lawm thu a hrilh bawk.
Art & Culture department hotu ten an sawi danin, Aizawl-ah Vaivakawnah leh Bawngkawnah te Cultural Centre-cum-Auditorium sak a ni tawh a, Lawngtlai-III-a mi hi Mizorama a pathumna a ni. LCCA hi Lawngtlai-III branch YLA-in an enkawl zui ang.
Nimin vek khan Lawngtlai East bialtu MLA chuan Lawngtlai Electric Venga Community health clinic centre, MLA fund Rs. nuai 4 senga sak pawh a hawng a. Lawngtlai East bialah Community health clinic centre 11 hawn remtih a nih hnuah, hmun thuma building awm sa tih loh hmun dang hmun riatah MLA fund hmangin building sak a ni tih a sawi.
Sorkarin tunhnaiah Lawngtlai-III leh Lungtian-II-ah Centre dah a remtih leh thu pawh bialtu MLA chuan sawiin, Lawngtlai West bial lamah pawh hmalak mek a nih thu a sawi a. Centre hawn tawhahte MLA fund hmang bawka thawktu rawih an nih thu leh tunhnaiah sorkarin centre-a thawktute hlawh tumsak a remtih tak thu a sawi bawk.