Aizawl: Kumin fur ruahtui tlain an huan panna kawng a tihchhiat avanga thla hnih chhung vel an oil palm rah an hralh theih tawh loh hnuah, Mami district-a Tuidam Zau-a huan siamtuten an thlai rah hralh turin an phur chhuak thei leh tan.
Tuidam Zau-a oil palm huan siamtute hi fur ruahtui tla avangin an huan panna kawng chhiain a tibuai a, anmahni tawkin hnatlangin siam tha thin mah se kawngpui (highway) laihna lei vung tam takin an kawng a tihchhiat avangin July thla atang khan an thar chhuah hralh tura phur chhuak thei lo.
An harsatnate hi agriculture department hotute hnenah thlen thin mah se, an tanpui theih loh avangin Darlak Zaua oil palm huan neitu pakhat, Vanlalruata Pachuau chuan a JCB hmangin kawng siam thatsakin nimin atang khan an hralh chhuak thei tan a ni.
Tuidam Zau-ah hian chhungkaw 30 velin a huhoa oil palm huan siamin kum tin a rah an hralhna atangin sum tam tak an la lut ve thin a, hei hi chhungkaw tam zawk chuan an ei hmuhna ber a nih avangin a enkawl kawngah pawh thahnem an ngai thin hle a ni.