Aizawl: Social Welfare Minister Dr. K. Beichhua hoin nu nau pai leh naupangte tana chaw tha ei pawimawhzia zirtirna thla, Poshan Maah Poshan Maah (Nutrition Month) hawn a ni.
Kum tin September thla hi nu naupai leh naupangte tana chaw tha ei pawimawhzia zirtirna thla hman thin niin, he hun hman bul tanna atan nimin zingkar khan Dr. K. Beichhua chuan Poshan Maah hawngi rally nei turte Sikulpuikawnah a vai liam.
Dr. K. Beichhua chuan hrisel turin a bul tanna a pawimawh a nih thu a sawi a, hei vang hian nu in nau a pai atanga chaw tha ei a pawimawh tih a sawi.
“Chaw tha ei pawimawhzia inzirtirna chu department pakhat mawhphurhna chauh ni loin department hrang hrangte bakah khawtlang mipuite an tanrual a ngai a ni,” a ti.
He huna kalkhawmte chuan ei leh in tha ngai pawimawh tur leh fai turin thutiam an lak bakah mi dang zirtirna kawngah theihtawp chhuah zel turin an intiam nghal.
Hawnna inkhawm hi Director Women & Child Development Department Lallianpuii’n a kaihruai a, Deputy Director Sailopari’n thutiam neih tirin, Joint Director Zoramthangi Chhangte-in rally tawpah lawmthu sawiin an hun hman a khar.