Aizawl: Save Chite Executive Committee nimina an chairman Renu Sharma, IAS, Chief Secretary hoa thukhawm chuan huam zau zawka an hma lakna tur duang turin North Eastern Regional Institute of Water & Land Management (NERIWALM) an pawm.
MINECO-a Chief Secretary Conference Hall-a thutkhawmah Save Chite Lui chuan Chite lui leh a chhehvela hma lak dan tur hrang hrangte an sawi ho a. Tezpur-a NERIWALM chu an hmalaknate huam zau zawka duang turin September thla tir hian Aizawl-ah lo kal turin an beisei a ni.
Thutkhawmah hian tun thla chhungin Chite lui chhehvela ram neitute intawhkhawm te, kumin October leh November thlaah Chite luia bawlhhlawh leh thli luan luh theihna veng hrang hranga local council, YMA, MHIP leh MUP te nen hmun liah inthenin, intawhkhawm buatsaih leh kohhran hruaitute nen inkawm hona buatsaih an rel a. Heng intawhkhawmna boruak atang hian committee pahnih, Land Owner Committee leh Local Level Committee din an rel bawk.
Chite lui atanga lakkhawm plastic hnawmhnawk hmanga Reiek-a siam plastic road chu chief minister-in a hawn turah inbuatsaihnate an thlir ho bakah Bawngkawn-Durtlang kham panga ramngaw chereu zel chungchang chu ngun zawka lo zirchiang tur leh a tul anga rawtna siam turin Environment, Forests & Climate Change Department an ruat.
Thutkhawmnaah hian EF&CC Principal Secretary, Aizawl DC, PCCF leh hotu dangte an tel a ni.