SEDP duangtu -Drafting committee chairman Dr R Lalthangliana’n chhan hrang hrang avanga a tira SEDP kalpui dan tura duan anga sorkarin a kalpui theilo pawi a tih thu a sawi.
Hnahthial district-a SEDP kalpui tura hawnna, nimina Electric Veng community hall, Hnahthial-a neihah he thu hi Dr R Lalthangliana chuan a sawi tih sorkar thuchhuahin a tarlang a. Sorkar chuan theihtawp chhuah inhuam (political commitment) mahse, an hun tawnin a zir ngang lo a ni tih mipui ten hriatthiampui turin a ngen niin sorkar thuchhuah chuan a tarlang.
Dr R Lalthangliana chuan SEDP chu tuna sorkar pian hma, kum 2014 bawr chhovah MNF President Zoramthanga hova buaipui chhoh a nih thu leh SEDP duang tura drafting committee din a nih thu a sawi a. He committee-ah hian chairman a ruat a nih thu leh mithiam leh university lama heti lama ngaihtuahna seng thiam leh seng mi te rawn an nih bakah study cell te siama SEDP chu uluk taka duan chhuah a ni thu a sawi.
Sorkarna an chan hnuah harsatna hrang hrangin a tlakbuai zui thu Dr R Lalthangliana chuan sawiin, SEDP chu a tira kalpui dan tura duan anga kalpui theih a ni ta lo niin a sawi a. Rin lawk loh thil thleng – COVID19, Vawk hri leng, Myanmar raltlan leh lirnghing-ah te sorkarin sum tam tak a sen thu te mipuiin hriatsak se a duh thu leh mipui hriatthiamna thui tak sorkarin a mamawh thu a sawi bawk.
Minister Dr R Lalthangliana chuan hun khirh tak ramin a tawn mek karah leh sum harsatna karah family oriented SEDP kalpui tura hawn theih a ni ta erawh mipui tan vanneihna a nih thu a sawi a. SEDP atanga puihna chu a tamlo a nih pawhin engemawa tlak ral mai mai lova a tangkai thei ang bera hmang turin mipuite a chah bawk a ni.