Hmeichhe tennis player ropui Serena Williams chuan US Open zawha chawlh lam a rilruk tawh avangin a inkhel in ngaihven a hlawh thei hle a. Second round-ah seeded number 2 Anett Kontaveit hmachhawnin a tana chona hautak tak ni tura ngaih a paltlang a. Third round lut turin hnehna a chang.
Flushing Meadows a inkhelah hian thla thar a kum 41 tling tur Williams hian a khingpui hi 7-6 (7-4) 2-6 6-2 in a hneh a. Zanin hian Australian mi Ajla Tomljanovic a hmachhawn leh ang.
Inkhel tan tir lamah player pahnihte an inel tawk hle a. Set hautakah Williams a chak. A hnu lamah set hnihnaah a khingpui chu langsar zawk mahse set hnuhnung berah a tawnhriat a chakpui.
“Chona hmachhawn hi nuam ka ti a, hei hian chakna min pe thin. Tunhnaiah inkhel tam lo mah ila ka practice tha hle a, tunah New York-ah hian a rah a rawn lang ta a ni.” tiin Williams chuan a sawi.
“Tournament ka khelh hnuhnun lamah beisei ka pha lo hle a, chuvangin tunah hetiang anga ka khel thei hi ka lawm hle.” a ti.
Nilaini zan leh Ningani zingkar lam inkhel dangah world number three Maria Sakkari chu second round atangin vuak thlak a ni a. Wang Xiyu lakah 3-6 7-5 7-5 in a tlawm.
Tualchhung beiseina kum 18 mi Coco Gauff chuan Elena-Gabriela Ruse 6-2 7-6 (7-4) in a hneh.