Vikrant hi sorkar ta, Kerala-a Cochin Shipyard-ah a la ding mek a, hei hi an sakna hmun leh Modi-a’n a hlanna hmun a ni.
A chet chhuah hunah chuan amah hi hnathawhna hmun a ni nghal dawn a, thawktu mi 1,700 zet chenna tur a ni nghal bawk ang.
Chanchinbumiten hlan a nih hmaa an tlawhnaah Throttle Control Room an tih, lawng thununna hmunpui berah senior engineering officer Lieutenant-Commander Sai Krishnan chuan, “He hmun atang hian gas turbine engine thunun a ni a, chu chu a chettirtu a ni,” tiin a hrilh a. Engine pali, power 88MW zet pe chhuakin lawng lian chu an tiche tih a sawi.
Ei in siamna pathum a awm a, hetah hian coffee thlit chhuahna khawl, dawhkan leh thutna a awm a, bungbel dahna hmun lian tak a awm tel.
“Pathumte hi zawm khawm vek ta ila, a rualin mi 600-in chaw an ei thei ang,” tiin officer chuan a sawi.
Lawngah hian damdawi in pawh a awm thlap a, khum 16 a nei a, mi zaihna hmun pahnih leh intensive care unit a awm tel bawk.
Tun dinhmunah chuan a thlawhna dah khawmna (hangar)-ah chuan Russian siam MiG-29K indo thlawhna leh Kamov-31 helicopter chauh a la awm rih.
“Thlawhna hunna hmun zau tak a awm a, a hunna bakah a en felna leh siam that (repair)-an a awm a. He hmun atang hian thlawk chhuak turte chu a chawina hmanraw bik (special lift) hmangin flight deck-ah chawi chhuah an ni ang,” tiin Lieutenant-Commander Vijay Sheoran chuan a sawi.
Navy hian Vikrant atanga thlawhna thlawh chhuahtir hi kumin kum tawp atangin an ti tan dawn a ni.
“Kan flight deck hi sq metre 12,500 dawn, hockey field pahnih leh a chanve vel a ni a, vawi khatah a rualin fighter 12 leh helicopter paruk chettir theihna a ni,” tiin flight deck officer Lieutenant-Commander Siddharth Soni chuan a sawi.
Flight deck an tih hi thlawhna phur chi lawng liana an tlankawng, a chung chhuat zawl hi a ni.