Boycott tura nawrna na tak karah tujn thla September 9-a tlangzarh tur ‘Brahmastra’ chu Hindi film siawm tawha senso tam ber pawl niin, cheng vaibelchhe 410 vel zet sen a ni.
Karan Johar enkawl Dharma Production, Starlight Pictures leh midangte inrawlhna film-ah hian high-quality VFX changkang ber ber hman a ni a, Indian film siam tawha VFX hman tawhna dan nena khaikhin pawhin kawng engkimah a chungnung fal tura ngaih a ni a, cinematic work ah ngat phei chuan bung thar a keu dawn niin, an sawi.
‘Brahmastra – Part One: Shiva’ hi Bollywood-in ama puala cinematic universe a neih, ‘Astraverse’ bultanna hmasa ber a ni dawn bawk a, 2016 atang tawha buaipui he film hi a hmawrbawk turin kum 5 lawih nghah a ngai a, an zo thuak hnu ah Covid-19 hripuiiin a nuai chawpchilh zui bawk nen, hun a duh rei ta hle.
Bollywood star Ranbir Kapoor inlanna film hi Indian mythology-a innghat niin, ani hian Hindu pathian Shiva lemah a chang ang.
‘Brahmastra: Part 1- Shiva’ hi September 9, 2022 hian cinema hall-ah tihchhuah tan a ni ang a; HIndi, Tamil, Telugu, Kannada leh Malayalam tawngte a eng theih a ni dawn a ni.
HMABAK HUPHURHAWM
Tarlan tawh angin Amitabh Bachchan, Ranbir Kapoor leh Alia Bhatt te inlanna film hi en lo leh buaipui lo tura ngenna leh sawmna chu social media-ah trending a ni leh tawh a, filmstar te tan mangchhia a ni chhunzawm zel.
Tunhnai khan film beiseiawm leh hit ngei tura rin kai, ‘Laal Singh Chadda’, ‘Raksha Bandhan’, ‘Dobaaraa’ leh ‘Liger’ te chu Boycott runpuiin a tuam hlup hlup hnu-ah Box office-ah an chechhia.
Tunah hian #BoycottBramastra thawm a ring leh tawh a, he film-a inlan te’n tunhma lama sakhuana pawisawi zawng an tawngkam leh chet dan vel te phawrh chhuah leh niin, an thusawi leh khawsak dan te chuan a vawlet leh dawn ni maia ngaih a ni.
Hman deuh khan Alia Bhatt-i’n a film te chu a duh dan en theih, duh lo te tan en lo mai tur, tih lam hawiin a lo tawngchhuak tawh bawk a, tunah an haw thar nasa hle.A nghawng thui ang em le?