Lirthei khalhtu leh neitute kan fimkhur sauh sauh a tul
Sorkar in dan thar hmangin, tun thla ni khat atangin lirthei neitute documents chungchangah khauh zawkin hma a la a, pawisa chawi zat pawh dan thar anga kalpui niin, vawiin thlengin man tawk an awm chho reng ta bawk.
Hetih lai hian zing leh tlai lam, naupang school kal hun leh ban hun bakah pisa kai hun leh ban hun erawh dan pangngaiin lirthei a tawt a, chhun lam erawh nidang aiin lirthei che vel a thawl hret hret niin a lang thung a ni.
Traffic Police hotute chuan dan thara sum chawi tur zat ang chu dan bawhchhiate chawitir nghal an nih thu an sawi a, lirthei tlan chhuak tlem mah se dan bawhchhia an man zat erawh a hma ni nen khaikhinin a tlem hran lo tih an sawi bawk.
The Motor Vehicle (Amendment) Act, 2019 hnuaiah chuan dan bawhchhiaten sum an chawi tur chu a tam hle a, dan hluia licence tel loa lirthei khalhin Rs 1,000 an chawi thin kha Rs 5,000 an chawi tawh dawn a, heng bakah dan tesep hrang hranga sum chawi tur pawh a let aia tam fein a pung tawh dawn a ni.
Chuvang chuan lirthei neitute leh khalhtute pawh kan fimkhur sauh sauh a ngai a, kawng lehlamah sorkar kan puih ve theihna anga a lan dawn dawn avang hian a endiktu lamte pawhin kawng thenkhatah chuan mipui lam hriatthiamna thui tak an nei erawh a ngai rihin a rinawm. A khalhtu lamte pawh i fimkhur zual sauh sauh ang u.