Argentina vice-president chuan amah thah an tumna a pumpelh hlauh va, silaia kah an tumna chu a tang (jam) hlauh va, a him hram.
Video darhah chuan Cristina Fernández de Kirchner-i hi amah thlawptu mi tam takin an bawr laiin silai kah mai theih (load sa)-in hmun leh hmunah tin hman a ni.
President hlui hi ei rua an puhna thubuaia court-a a inlan haw lam, an chenna in tual maiah thah tum a ni a. Ei rua puhnaah hian tihsual a neih loh thu a lo sawi tawh.
Police chuan kah tumtu hi mipa kum 35 mi, Brazilian a nih thu tual chhung chanchinbute hnenah an hrilh a, manin an kawl mek tih an sawi.
Kum 2007 atanga 2015 chhung president lo ni tawh leh a hma kum li chhung first lady lo ni tawh bawk thah tum a nih chhan hi police chuan chhui chhuah tumin an bei nghal mek.
President Alberto Fernández chuan silai hi a mu panga awm, in-load sa a nih thu leh a puak thei ta lo hlauh niin a sawi.
Social media-a video thehdarhah chuan silai kengtu hi mipui zing atanga dawk chhuakin Fernández de Kirchner-i hmaiah a tin a, ani pawhin a beng lo hupin a kun tih a lang thei.
Video dangah mipui hian amah hnaih taka silai kengtu nia an sawi lakah hian Fernández de Kirchner-i hi hliah an tum tih a lang bawk.
Mipuite hi zan rei vak lo liam ta atang khan ei rua an puhnaah amah tantu niin an thlawpzia tihlan nan a in bulah hian an pung khawm a. President a nih laiin sorkar sum dik lo taka hmanga puh a ni.
Police thupuangtu chuan silai kengtu hi an man hnuah a silai tak hi hla vak lova an chhar zui thu Reuters news agency a hrilh.
Ningani zan tlai tawh taka thuchah a sawiah President Fernández chuan, “Cristina-i hi a chhan tak la hriat loh vangin a la dam a, a mu panga awm silai kha a puak lo hlauh a ni,” a ti.
President hi Fernández de Kirchner-i leh a pasal te an ram president an nih chhung zawk khan chief-of-staff a ni.
A beitu demin Fernández de Kirchner-i thah tumna chu kum 1983-a an ramin mipui rorelna a neih hnua ‘thil thleng serious ber’ tiin a sawi.
President Fernández hian hetiang tharum thawhna leh inthah tumna thleng hi an duh lo va, an ramah inhuatna lam sawi pawh an duh lo tih a sawi a. Zirtawpni kha Argentine-ten ‘nunna, mipui rorelna chhan nan leh kan vice president lamah kan tang tih entir nan’ ram pumah chawlh a puang.
Economy Minister Sergio Massa chuan beihna thleng hi ‘mi that tumna’ tiin a sawi a. “Huatna leh tharum thawhna thleng hi inhnialna a tam a, khawtlang nun a tichhia,” tiin Twitter-ah a tar lang.
Fernández de Kirchner-i hian amah an beihna chungchang hian engmah a la sawi ve lo thung.