Langkaih Group YMA leh Taitesena Group YMA-in kuhva rah hralh kawnga harsatna chungchang zirchiang tura an din, Jt. Group YMA Study Team Leader Vanlalruata Pachuau leh Secretary Lalvenhima Ralte ten nimin khan Assam Chief Minister Himanta Biswa Sarma hmuin, Mizorama kuhva chingtute harsatna tawh sutkian dan tur an sawipui.
Assam chief minister chuan Mizorama kuthnathawktute harsatna a hriatthiampui thu leh Assam-ah pawh Burma kuhva ro avanga kuthnathawktuten harsatna an tawh ve thu Jt. Group YMA study team aiawhte chu a lo hrilh a. Jt. Group YMA study team aiawhte nen an inkawm lai hian Mizoram Chief Minister Zoramthanga biain kuhva chingtute harsatna tawh chungchang chu Delhi-ah Union Home Minister Amit Shah hova sawiho tha a tih thu a hrilh nghal bawk.
Langkaih Group YMA leh Taitesena Group YMA-in kuhva hring hralhna tura hma an la dawn a nih chuan harsatna siam an tum loh thu leh rem a tih thu Assam chief minister chuan a sawi a. Principal Private Secretary to CM (Assam) lo bepawp a, Assam DGP leh YMA-in kuhva leitu tur Marwari an lo biakte leh YMA nen a rang lama meeting neia hma la turin Jt. Group YMA study team aiawhte chu a lo hrilh bawk a ni.