Myanmar-a sipai hnuaia awm court chuan Aung San Suu Kyi chu inthlan tichingpena puhna thubuaiah thiam loh chantirin kum thum tang turin a hrem tih a dan hre miten an sawi.
An ram hruaitu hlui, Suu Kyi-i hi a hmaa thubuai 11-a thiam loh an loh chantir tawhna nen kum 20 zet lung in tang tura tih a ni ta a, a dang puhna pawh a la awm nual.
An puhna zawng zawng hi ani chuan a pha vek a, a chungthu an rel leh rem dan pawh mihring dikna chanvo humhalhtu pawl tam takin demin politics-a thil kalpui vek niin an sawi.
An puhna zawng zawngah thiam loh a chang vek a nih chuan kum 200 dawn lung in tantir theih a ni dawn.
Hremna an pek thar berah hian rim taka hnathawh pawh a tel niin a dan hre mite chuan an sawi a. Kum 77 mi, Nobel chawimawina pawh lo dawng tawh hi an man hnuah a hun tam zawk chu an khawpui, Nay Pyi Taw-ah pawn chhuak thei lova hren a ni.
A thu an relnaah hian vantlang leh chanchinbumi tel an phal lo va, sipaiten a dan hre mite chu chanchinbumite hnena engmah sawi lo turin an veng bawk.
Court chuan November, 2020-a an ram inthlanpui, an party, National League for Democracy (NLD)-in chiang taka hnehna an chan tum khan inthlan dan bawhchhiain a tichingpen nia puhnaah thiam loh a chantir a ni.
Sipaite chuan nikum khan inthlanah hian dik lo taka tih a tam nia puhin thuneihna pawh an chhuh a; mahse, a hranpaa chhuitute chuan inthlanah dan pela thiltih a awm lo niin an sawi ve thung.
Mihring dikna chanvo humhalhtu leh mipui rorelna duhtu pawlte chuan Suu Kyi-i leh mi dangte chunga rorelna chu a dik tawh lo niin an sawi a, UN pawhin ‘chungthu rel dan zahpuiawm’ tiin a sawi a. Sipaite erawh chuan Suu Kyi-i chungthu rel dan chu tih dan pangngai a nih thu an sawi thung.
Nikum February-a sipaiten thuneihna an chan kha Myanmar-ah hian mipuiin nasa taka dodalin mipui rorelna duhtu, activist leh chanchinbu mi eng emaw zah man an ni.
Suu Kyi-i leh an party mi thahnem tak man tel an ni bawk.