Aizawl: MNF President Zoramthanga, chief minister chuan nimin khan MNF party pisa Mizoram Hnam Rûnah thu sawiin, SEDP dawng tura thlan chhungkaw 60,000-te chu kumin chhunga Rs 50,000 pek hmana sorkar kum tharah pek belh leh an tum thu a sawi.
Zorama chuan MNF sorkar flagship programe SEDP chungchang sawiin, “Kumin chhhung ngeiin SEDP 1st installment Rs 25,000 leh 2nd installment Rs 25,000 theuhin kan sem dawn a, heng mite hi financial year tharah sum pek belh an ni dawn,” a ti a, chumi piah lamah a dawng thar tur sing tel an pek belh leh dawn tih a sawi a, SEDP sum chu khawi atanga sum puk emawa sem an ni lo a, Mizoram budget atang ngeia sem an nih thu a sawi a ni.
Mizoram sorkara finance department changtu ni bawk, Zorama chuan Covid-19 leh chhan hrang hrang avanga sum dinhmuna harsatna a thlen mek laiin Delhi-in CSS sum release vek tura state zawng zawngte a tih angin Rs vbc 600 an pe chhuak tih sawiin, heng bakah hian SEDP-ah Rs vbc 150, electric leina atan Rs vbc 37, PMGSY-ah Rs vbc 70, tun hnaiah hlawh leh thil pangngai piah lama an pek chhuah chu Rs vbc 800 dawn a nih thu a sawi a, “Pathianin rem a ruat a, kan ti thei zel a ni,” a ti.
MNF president chuan eptu party-te chu sorkar sawiselna tur leh hekna tur ringawt zawngah a puh a, “Mi thatna lai sawi an thiam ngang lo a, mi chhiatna lai zawng char char leh sawiselna tur ringawt zawngte hian ngeitu an ngah tulh tulh,” a ti a, an thu thiam chu ruling beih nan chiah a tha tih a sawi.
Zorama chuan Congress chu Delhi lamah pawh inthlang hleithei lo khawpin an buai tih a sawi a, “Bâng si, thu ber tum bawk si Rahul Gandhi an nei a, an buai hle a ni. Mizoramah pawh hian MLA pahnih khat bak an neih a rinawm lo,” a ti a, ZPM chungchang sawi zawmin, candidate tur an insawm tam lutuk avangin an la buai dawn tiin, “Pawl lehlamin candidate an lo sawm tam tawh lutuk a, pawl leh lam zin chhuakin an sawm zung zung zel bawk si a, nomination committee thu se an buai nasa khawp ang,” a ti bawk a ni.