Mizoram Premier League season thar chu September 1 khan kickoff a ni a. MPL9 hi Sports Minister Robert Romawia chuan a kickoff.
Dawrpui Multipurpose Centre-ah MPL9 kickoff hun hi hman a ni a. September 8 atangin inelna tan a ni dawn a. Rajiv Gandhi Stadium-ah inkhelh tur niin a ni hmasa berah dar chhun dar 12-ah Chawnpui FC leh Aizawl FC an inkhel ang a. Tlai dar 3-ah Chhinga Veng FC leh I-Day champion Mizoram Police FC an inkhel ang.
Sports minister chuan hunrei tak hripui leng avanga football inelna sang a khelh theih loh hnuah chhunzawm a ni leh thei tur chu lawmawm a tih thu a sawi a. Hripui vangin MFA leh club te pawhin harsatna an tawk vek a, MPL khelh a nih theih nan a club hruaitu te ṭhahnem ngaihna leh sum leh pai thawh tute te inpekna lawmawm a tih thu a sawi.