Aizawl : PC party-in chhuanlam dang siam lova a rang thei ang bera sorkar hnathawkte August thla hlawh pe turin Mizoram sorkar an ngen.
PC party chuan “Chief Minister Zoramthanga kaihhruai MNF sorkarin sawrkar hnathawkte hlawh pe mumal thei lo khawpa sum enkawl kawnga a hlawhchham hi vanduaithlak kan ti” an ti a. A rang thei ang bera sorkar hnathawk te August thla hlawh pe tur in sorkar chu a ngen a ni.
Kum 35 state puitlinga chhiar ve tawh Mizoram state-in roreltu tha a mamawh tawh takzet niin PC party chuan an sawi a. “Mahni hnuaia thawkte hlawh pawh a hun taka pe mumal thei lo sorkar kan hrawn thin hi hnawl ngam tawh turin Zoram mipuite kan ngen” an ti.
Nakuma MLA inthlanpui lo awm turah ram rorelna fawng chelhtute zinga dinhmun pawimawh tak luah turin chak takin hma an la chho mek niin PC party chuan an sawi a. An party policy leh programme tihhlawhtlin duhtute nen Zoram mipui beisei sorkar tha, mipui sorkar siam tura an inbuatsaihna hlawhtling taka hlenchhuah a nih theihna turin Zoram mipui tawiawmna an ngen tih an sawi bawk.