Health Minister Dr R. Lalthangliana’n nimin khan Synod Higher Secondary Sch- ool Auditorium, Aizawlah National Deworming Day (Rulhut Do Ni) a hawng a. Hemi rual hian district hrang hrangah pawh Rulhut do ni hi hman a ni bawk.
Naupang leh zirlai zawng zawngte rulhut laka an fihlim theihna turin National Deworming Day (NDD) hi India ramah kum 2015 ah state/UT 11 ah hman tan a ni a. February 2016 atangin India ram pumah hman a ni. He hmalakna hi rulhut pai avanga natna hrang hrang thleng thei – thisen tlakchhamna leh naupang thanthu um bona tura ruahman a ni a, kum 1–19 inkarte tan kumtin vawihnih rampumah hman thin niin, hemi ni hian kum 1–19 inkarte chu rulhut-hlo (Albendazole) eitir thin an ni.
Mizoram bikah kumin April 2022 khan naupang sikul kal leh kal lo za-a 96 rulhut hlo Albendazole an ei a, nimina ei ve thei lo leh ei hman lo te pawhin an ei ve theuh theih nan tun thla ni 9-ah Mop Up Day neih leh a ni ang.
Aizawla National Deworming Day hawngtu Health Minister chuan naupangte an thanlen kawngah hriselna tha an neih theih nan sorkarin kawng hrang hrangin hma a la tih sawiin, chung zinga pawimawh tak pakhat chu rulhut laka naupangte fihlimna a nih thu a sawi a. Rulhlutin naupang hriselna a khawih pawi theih dan te sawiin, rulhut pai lo tura tih theih awlsam tak chu kut silfai that, thlai leh thei eitur silfai that, tui thianghlim chauh in, ekin tha leh thianghlim taka inthiar, ei tur khuh that, in leh a vel vawn fai te leh khawlaiah pheikhawk bun thin te a nih thu a sawi bawk.