ZPM Leader Lalduhoma chuan sorkar siam tura mipui beisei ber chu ZPM an nih thu a sawi.
Dampa bial fanga fehchhuah mek ZPM party hruaituten Rajivnagar, Tuipuibari, Damparengpui, Hruaitluang leh Khawhnaiah te vantlang inkhawm an neihah thu sawiin Lalduhoma hian, “India ram pumah Congress an tlachhia a. MNF lah hnam dang dan loa sumdawngte phenah an hotupa ber chief minister a awm niin mipuiin an ngai a, candidate tha tak tak rawn nei leh mah se a lu berin a zir loh avangin an tla dawn,” a ti a; ZPM chu mipui beisei ber an nih thu a sawi.
ZPM-in ruahmanna fel tak siamin policy an tlangzarh tawh tih sawiin, sorkarna an siam chuan thlai tharte hi rate mumal tak siamin, ram pawna thawh chhah leh ram chhunga hralh dan turte a tahtawlin sorkarin a ruahman ang a, a tul dan ang zelin minimum support price a pe dawn niin a sawi.
“Tih tak taka titute chu an banah kai chungin hma kan lakpui dawn a. Kuthnathawktute tan kan thil thar chhuahte a hralhnaah kan buai a ngai tawh dawn lo a, budget-ah chumi pual chuan pawisa kan dah dawn a ni,” a ti.
Tuna ram sum leh pai dinhmun thlirin sum enkawl kawngah sorkar hrawn mek MNF hi a hlawhchhamah puhin Lalduhoma hian, “Mizoram sorkar sum dinhmun a tha lo a, state khat sorkar ve riang ruangin Rs. nuai 20 chauh neih changte an nei hial a ni,” tia sawiin, ram sum dinhmun a buai chhan ngaihtuah a tul thu a sawi bawk.
ZPM leader hi General Headquarters hruaitute, block leh unit hruaitu eng emaw zatin an tawiawm a. Rajivnagar-ah unit leh Zonu unit a ding thar a, Undermanik-ah unit thar din a ni bawk.