Aizawl: MPCC thupuangtu PC Laltlansanga chuan Mizoram tana sorkar tha pe turin Congress a sorkar leh thuai dawn tih a sawi.
Nimina Congress Bhavan Golden Hall-ah Political Session neihah thu sawiin PC Laltlansanga hian, Mizoram mipuiin ram hruaitu lu ber atana tha ber tur an buk mek niin a sawi a. “A hun kal tawha duhamna avanga hminghluaina nei ve lo Pu Lalsawta’n tha a tih dan ang takin min kaihruai dawn a. Chutiang tur chuan party mite pawh kan inhlan a ni,” tiin, sorkar tha Mizoram tana pe turin Congress a sorkar leh thuai a ngai a, a sorkar leh thuai dawn niin a sawi.
PC Laltlansanga hian Mizoramin ram rotling a neihte chu Congress sorkar din vek tih ngam a nih thu a sawi a. Thuneihna changa sorkar mek MNF hian thil danglam Mizoram tana a tih chu taxi rawng thlak, Children Park City park an vuah, Town bus City bus, MIMER chu ZMC tia hming thlak te a nih thu a sawi a. “Chief minister berin ram dinhmun a ngaihtuah lo, ama dinhmun chauh a ngaihtuah. Chutiang tura mi tha ni lo amah thlawp theitu lamtang siamin, cheng khat hlawh tura nihna sang tak ruattu a ni,” a ti.
MPCC general secretary hian ZPM party chungchang sawiin, “Unit system nuai bote an sawi a, Chakma tel lo sorkar siam tumin Chakma-ah unit leh block an din a, an Val Upa Council thupek pawisa loin hlawh leh hamthatna dang zawng zawng an la vek bawk. A tak finfiah tur awm si lo, mipui rilru hruaikawi tura thusawi ching an ni,” a ti a; Mizoram mamawh chu Kalphung Thar ni loin ‘Nihphung Thar’ a nih thu a sawi.