- F. Vanlalrochana
- HLA PAHNIH LEH A THLUK
KHB 181: CHHANDAMTU NGILNEI CHUAN – Baltimore kohhran Biak In a ni a. Pathianni a ni. Zaipawl te pawh an zai a. Pastor in thuchah a sawi tan tawh a. Elvina Hall-i, zaipawl member pakhat chu, sermon ngaithla ve tur chu a ni ngei mai, zaipawl member a ni a, a inkhawm ve bawk.
Zaipawl thutnaah a thu a. Hmanhmawh deuh hian lehkhapuan a zawng kual a. Thil ziah a tum a ni.
Lehkhapuan a hmu zo mai si lo a, a hlabu phek tur lama phek khat engmah inchhutlohnaah chuan hla thu, chang li zet chu a ziak ta a ni. Chu a hla ziah chu, a hnua, “Ka bat zawng zawng Isuan min tlak sak” tih hla hmingthang tak lo ni zui ta chu a ni.
He hla thluk siamtu hi John T. Grape-a ni a, Baltimore kohhran zaihruaitu, Baltimore khawpuia lungalhtheia sumdawng lian ber a ni bawk. Nikhat chu piano hi a hmet ri deuh mai mai a. Amahin a rimawi tum rik chu hla thluk tha tak ni turah a ngai a. A solfa-in a ziak chhuak ta a ni. An pastor hnenah a pek chuan, hla thluk nalh takah pawh a lo ngai lem lo a. Amaherawhchu, Elvina Hall-in a hla thuziah chhuah sa pastor hnena a han pek chuan, pastor chuan John Grape-a hla thluk lo pek tawh sa chu a hre chhuak a. A hran ve ve hla thluk leh thu a thluk siamtu leh a thu phuahtuin an pek chu, a han enkawpin a han sa chhin a, a lo inmil chiah mai hi a lo ni a. John Grape-a hla thluk ziah chhuah sa chuan thunawn a neih a vangin, Elvina Hall-i pawhin, a thunawn thu tur chu a phuah ve leh ta a ni.
“Ka bat zawng zawng chu,
Isuan min tlaksak
Ka sualna zawng zawng te nen,
Aman a tleng fai ang” tih hi.
Mizo tawnga lettu Rev. Vanchhunga.
KHB 400: HNEH THEIH LOH NUN KA NEI: Hneh theihloh Nun ka nei, tih hi Kristian hla ropui tak a nih hi! Lalruali hla phuah kan ti liam mai zel a. Nih pawh a ni a, a thluk hi Rokunga siam a ni tih pawh kan hria a. He hlaah kher kher erawh hi chuan Rokunga hian a thluk a lo siam sak satliah a ni ngawt lo.
1965 khan Rokunga ch Durtlang Hospital-ah damloin a awm a. Chumi tum chuan Hla thluk hi a dawng nawlh mai a. A hla thluk chu part liin a ziak chhuak nghal a. A thu phei chu a nei lem lo.
Hetih lai hian Lalruali’n, Hneh theihloh Nun ka nei, tih hla thu chu a lo ziak/phuah chhuak hlim hlawl ve bawk a. Rokunga hian, 1958-ah “ka Chenna Ram thlaler a ni” tih hla thluk hi a siam sak tawh avangin Rokunga hnenah chuan ‘Hneh theihloh nun ka nei” tih hla thluk pawh chu siam sak ve leh turin a ngen ta a. Rokunga chu damdawiin a awm ve tho a nih avangin, a ngaihsak zui rih lem lo a.
Ni enge maw zah hnuah chuan Rokunga chuan a chunga sawi tak ng khian hla tthluk hi a dawng hlawl mai a. A ziak chhuak ta a. A tukah chuan, Lalruali hnenah chuan, “khawi maw , hmannia i hla kha a thu min lo hmuh leh teh” a ti a, an ha khai khin chuan, lalruali hla thu leh Rokunga hla thluk chu a lo inhne rem chiah mai a ni. Chutiang chuan, 1965 khan Mizo Kristian Hla ropui tk pkhat chu a lo piang chhuak a ni.
“Hneh theihloh nun ka nei” tih hi Lalruali hla a ni bik lo a, Lalruali leh Rokunga hla a ni a. Kan zavaia ta a ni.
Lalruali chanchin leh a harsatna tawh dan te, he hla thu nena a nun a inhmeh em em dan te pawh hre lo kan awm nawk ang a???
- MC LALRINTHANGA….
MC Lalrinthanga khan tun hma deuha Mizo lehkhabu tha ho kha chu a published a tam mai. Kohhran tih loh chuan lehkhabu sum senga tichhuak tam pawl tak a ni ang. 31.08. 2022 zing khan a thi a, Mizo literature tâna a inphalna kha hriat reng a ni tawh ang.
Lehkhabu a published a ni mai lo a. Amah pawhin a ziak ve a. A chanchinah khan Bu khat chauh an sawi a. Malsawma Colney tih bu te, M. Lalmanzuala tih leh bu danh pawh a ziak a ni.
Lehkhabu chhuahnan pawisa a hmang a ni mai lo a. Hun rei fe chu Mizo Academy Of Letters-in Book of The year lawmman an pek thin hi ama tum a ni a, Mizo Writers Association-in Translation Book of The Year an hlan thin pawh hun rei fe chu lawmman chu ama tum a ni.
Mi hausa kan nei ve nual ta! Mizo Literature tana mahni sum bawm hawng chu tlemte an ni. A chhan chu a hlawk lo a. Khuallianah te an tan phah ve ngai lo a. Post sakte an hlawh ve ngai lo a ni.
Tun laia miin sum a phawrh chuan engemaw kawng zawk taka a hlawk letna tur a zawn vang a ni. Khuallian te an ni a, tuten emaw an thultih fakna te an vawrh darh a. MLA-ah te an ding a, an tling a. Vote thlir rana ti an ni em aw a tih theih. Chutiangte ngaihtuah chuan MC Lalrinthangan Mizo Literature tana a sum a lo phawrh ui lo em em mai kha a ropui danglamin a chhinchhiah tlak em em a ni.
Chutiang mi chu a lo kal ta a. Kawng dangah chuan ka hre lo a. Hriat ka chak lo a. Tun laiah pawh heti hi a ni a, tun hmate phei kha chuan lehkhabu a sum sen hi a hlawk lo em em mai a. A hlawk lo tih hre rual a ni a. Kan hnam tana tha a ni tih a hre si a. A ui lo mai a ni. Chu chu a ropui lai tak a ni a. Mi hausa kan tih ang hi a tling pawhin ka hre lo a, chungte hlei hlei chu a inpekna ti ropuitu a ni zual a ni. Tun hnu deuhte hian mi tan sum a sen nasat zia te, a inphal zia leh a hlawk chuan loh ziate hi a sawi lem chuang lo bawk….Mi hi an hlutna lai tak hi an hlutna a ni tih hi hriat a tha khawp mai…
Miin an ziak nual a. Kan hnam literature tâna mi hlu a nih avang hian han thai ve a phuin ka hria a. Kan han ziak ve a ni.