Atalanta tan Dutch midfiedler Teun Koopmeiners chuan a team hnehna a chanpui a. Torino lakah hattrick siamin 3-1 in an chak.
La Dea hi hnehna an chan avangin Serie A table chung berah an awm a. Stadio Atleti Azzurri d’Italia a inkhelah an midfielder chhuanvawr a che tha fal.
Kum 24 mi defensive midfielder ball pass thiam Koopmeiners hian minute 84-naah a goal thumna a khung a. He goal avang hian AS Roma chungah an awm theih phah.
Halftime dawnah Ola Aina penalty chawi chu goal-ah chiang takin a khung a. Second half tan hnu lawkah Torino in freekick an petchhuah hlat tawk loh chu Dutch midfielder hian meter 23 a hla atangin a lo hlap lut.
Nikola Vlasic chuan minute 77-naah Torino tan goal khung ve mahse Atalanta substitute Ademola Lookman penalty hlawhchhuah chu Koopmeiners bawkin goal-ah a chantir.
Hetihlai hian Atalanta coach Gian Piero Gasperini chuan inkhel zawhah a squad lian lutuk chu a sawisel a. “Player kan ngah lutuk hi club in phurrit min siamsakna a ni zawk. Khel lo an awmin lungawi lo an awm zel dawn a, team boruak tha neih a har thin. Kan khingpuiten min chhaihbuai chu thuhran nise, keimahni leh keimahni kan buai hi thil tha a ni lo. Kan squad neihdan hi ka duhdan a ni lova, mahse kan insiamrem chawp zel a ngai. Player tha tha ka thlang anga ka khelhtir ang,” a ti.