Tata Sons chairman hlui, Cyrus Mistry chu Pathianni khan Maharashtra-a Palghar-ah lirthei chesualah a thi a, kum 54 mi a ni.
Ratan Tata thlaka chairman nihna chelhtu hi India rama sumdawnna enkawltute inpuhtawnna lian berah paih thlak zui a ni.
Mistry-a hi Ahmedabad atanga Mumbai panin Mercedes car-a a kal chu a chesual a ni.
Tawhsual a tawhna hmuna thlalak thehdarhah chuan a silver Mercedes car pawh a chhe hle a. Mumbai atanga km 135-a hla, Palghar-a Charoti-ah kawng thenna suin a chesual a ni.
“Tlai dar 3.15 vela thleng a ni a, Mistry hi Ahmedabad atanga Mumbai pan a ni a. Surya luia dawh leiah tawhsual hi a tawk a, chetsualna liau liau nia ngaih a ni,” tiin Palghar district Superintendent of Police Balasaheb Patil chuan a sawi.
A chuanpui dang, car khalhtu leh mi dang pakhat chuan hliam an tuar a, Gujarat-a damdawi inah lak an ni.
Mistry bakah hian Jehangir Pandole, Anahita Pandole leh Darius Pandole te an chuang a. Jehangir Pandole pawh a thi ve bawk.
Darius Pandole-a hi Tata Group-ah hian independent director niin chairman atanga Mistry-a paihthlak tumna pawh a duh lo hle a. Mistry-a rual hian Tata Group pawh a chhuahsan a ni.
Darius-a hi Anahita-i pasal niin Jehangir-a hi a puzawn a ni a, Anahita-i hian an car hi a khalh a ni.
Maharashtra Deputy Chief Minister Devendra Fadnavis chuan state police hnenah chetsualna thlen dan uluk taka zirchiang turin a hriattir nghal.
“DGP biain kimchang taka chhui tura hriattir a ni,” tiin state home minister hian Twitter-ah a tar lang.
Tun hi Mistry chhungkaw tana chhiatna dang a ni a. Pa ber, Pallonji Mistry chu June thla khan kum 93 mi niin a thi a. Asia khawmualpuia khualbuk changkang, khelmual, in ropui leh factory tam tak satu an ni.