Aizawl: Mizoram Pradesh Youth Congress Committee (MPYCC)-in Inrinni khan Aizawl Bazarpui tlawhin, bazar building thiah taka chawhmeh zuarten harsatna an tawh mekte an sawipui.
Chawhmeh zuarte nena an inkawmnaah MPYCC President Dr Lalmalsawma Nghaka chuan thu sawiin, Bazarpui thiah tak hi Congress sorkar khan a sakna tur sum Rs 3,641.59 hman nghal theih turin a hnutchhiah chu MNF sorkarin in kum li lai up betin a tikhawtlai zel chu tha lo a tih thu a sawi. MNF sorkar hian Bazarpui building hi lo sa thei tehreng pawh nise engtia rei nge an sak dawn tih hriat a nih loh thu sawiin, “Bazarpui building rang taka sak a nih theih nan hian court hial thlen kan inhuam a ni,” a ti.
Dr Lalmalsawma Nghaka hian Bazarpui eichawp leh thil dang zuarte harsatna tawhah hian Mizoram chhungkaw tam tak a nghawng tih sawiin, “Aizawl New Market sak that mek Aizawl City Centre Annexe building hna muang lutuk avanga chhungkaw 2,000 zet tawrhna hi a pawi kan ti a, sorkarin an harsatna sutkiang tura chak taka hma la turin kan phut a ni,” a ti bawk.
Chawhmeh zuarte pawhin thu sawiin tuna Bazarpuia inzuar mekte hi member 500 chuang an nih thu leh hlawm thumah an inthen chung pawhin hmun hmain a zawh loh lutuk avangin, chawlhkar khat dana in thut chhawk te, ni thum dana an inthut chhawk thu te an sawi a ni.
An thuchhuahah Congress Thalai hian New Market Building pui ber sak that hna kal mek hi Aizawl City Centre Annexe tih niin October 4, 2018-a kutthlak tan a ni a. Kum thum (thla 36) chhunga sak zawh tura tih a ni a, building sakna tura sum ruahman zat chu Rs nuai 3,641.59 niin, hei hi K. Deposit-a dah mek a ni.
MPYCC hian Chawhmeh Zuar Joint Association New Market hruaitute hnenah silpauline thahnem tak an pe a ni.