Dengue in min den loh nan i fimkhur thar ang u
Tunlai hian Aizawl leh a chhehvelah Dengue natna a leng thar hle niin hriselna lama hotute chuan an sawi a, thosi atanga natna hi kai a nih miau avangin thosi pian theihna leh in leh a vel tihfai that a tul hle. Health department hotute chuan September leh November inkar chu he natna kai a awlsam zual hun a nih thu an sawi a, kan fimkhur thar sauh sauh pawh a tul awm e.
Tun hnaia Dengue vei an punna hmuna nia sawi, Edenthar Veng khawtlang hruaitute chuan an veng chhungah Dengue natna vei an tam thu sawiin, “In lama inenkawl an awm rualin damdawi ina admit pawh an thahnem hle a, Synod Hospital, Durtlangah kan veng mi Dengue vanga awm mek an thahnem hle,” tiin an sawi a, thihpui em la awm lo mah se, an mangang rilru hle tih a hriat theih. Dengue natna veite zingah hian serious deuh hlekte pawh an awm niin an sawi bawk.
State Vector Borne Diseases Control Programme (SVBDCP) hotute chuan Dengue thehdarh thei thosi chu ‘Aedes aegypti’ a ni a, Mizoramah a tam hle tih an sawi a, hetihlai hian Mizorama awm Aedes aegypti tam zawk hian Dengue hrik an pai lo tiin, “Tuna Mizorama leng mek hi state pawn atanga rawn lut niin kan ngai,” an ti.
Engpawhnise, mipui lam kan fimkhur a tul hle a, dengue vei zingah thihpui awm rih lo mah se, he natna hi a nasat tawh chuan thihpui theih natna a ni tih kan hriat thar a, faina kawnga kan thanharh lehzual pawh a tul awm e.