Kum 2021 chhung khan Mamit district atangin Inner Line Permit (ILP) – temporary 1,860 leh regular 169 pekchhuah a ni a. Temporary ILP 1860 pek- chhuahna atanga sum hmuh Rs.1,86,000; regular ILP 169 pekchhuahna atanga sum hmuh Rs. 3,44,410 niin, ILP pekchhuahna atanga sum hmuh zawng zawng Rs. 5,30,410 a ni.
Kumina Independence day Mamita lawmnaa khuallian Ministwer of state TJ Lalnuntluanga thusawia a lan danin, kum kalta chhung vek khan Mamit district chhunga Common Service Centres 41 atangin Schedule Tribe (ST) certificate 2081 pekchhuah a ni a, Residential certificate 2395 leh Income certificate 3597 pekchhuah a ni.
Mamit DC office atangin Schedule Tribe (ST) certificate 316, Residential certificate 280, Income certificate 444, Death certificate 10 leh Birth certificate 81 pekchhuah niin, Tax exemption certificate 15 pekchhuah a ni bawk.
Kum 1999 atanga kumin thlengin Mamit Forest Division-in thingtiak 1,09,977 a phun tawh a. Kumin Green Mizoram Day-ah khan Planting agency 40 ten thingtiak 350 an phun a, thingtiak phun tur 4,422 semchhuah a ni.
Wood Based Industry hnuaiah Primary licence 10 pechhuak tawhin, Secondary licence 9 pekchhuah a ni tawh a. Kum 2021-2022 chhungin Forest revenue Rs. 55,18,859 leh kum kal mekah Rs. 15,61, 119 an hmu tawh.
District Transport Office, Mamit-ah kum 2021-2022 chhung khan lirthei chi hrang hrang 424 ziahluh a ni a, Driving licence 395 pekchhuah niin, chhiah chi hrang hrang atangin Rs.64,36,338 an hmu bawk.
Kum 2021-2022 chhung khan Mamit dist-ah Covid-19 kai nunna chan 22 awmin, mi 2 chhung te tih loh chu ex-gratia Rs. 50,000 pek vek tawh an ni.