Aizawl : Mizoram khawpui faia inelna leh Swachh survekshan 2023 atana inbuatsaihna kawngkhat atan Mizoram cleanliness competition 2022 sub-committee, Lawngtlai chu Lawngtlai khawpui veng hrang hranga kohhran ṭhalai te Lawngtlai khawpui chhung tifaiin Zirtawpni khan an hnatlang.
Lawngtlaia kohhran hrang hrang ṭhalaite chu chan insemin hnatlangah hian an thawk chhuak a, veng hrang hrang VC leh children sanitation club member ten kohhran thalaite hi an pui bawk.
LADC-a Sanitation department-in bawlhhlawh paihna motor tlan kualtirin, hnatlang thawhna hmun aṭangin bawlhhlawh khawn khawmin an paih fai nghal a. Hnatlang pawimawh leh bawlhhlawh paih nan hian VC, kohhran leh mimal lirthei thawh an awm bawk.
Lawngtlaia faina hnatlang-ah hian Thingkah atangin mi 50 an thawkchhuak a, AOC Veng atangin mi 129; Lawngtlai-III atangin mi 25; Vengpui atangin mi 60; New Vengpui atangin mi 65; College Veng atangin mi 120; Chandmary atangin mi 105; Bethel Veng atangin mi 20; Chawnhu atangin mi 55 leh Council Veng atangin mi 78, an vaiin mi 707 an thawkchhuak a ni.