Aizawl: Ni khat cham tura Mizoram lo kal Union Cabinet Minister of Women & Child Development Smriti Irani chuan Inrinni tlai khan Chief Minister Zoramthanga chu a chennaah hmuin an inkawm.
Union Minister Irani chuan Inrinni chawhma khan Lungleia kala district hotute nen inkawmna tha tak a neih thu chief minister a sawipui a. Sorkar hmalaknain hma a sawn nan thawktute an hriatna leh thiamna belhchhah tura training pek pawimawh a tih thu leh sorkar laipui chuan a tul anga training leh workshop buatsaih a inhuam thu te a sawi.
Chief minister chuan Mizoram chu state dang thenkhat khaikhin chuan economy hmasawnna kawng zawh naah bul a tan har avanga hmun dangte nen ang khata khaikhin a theih vek lohna lai a awm thu te, state economy-in hma a sawn zual zel theih nan theihtawp chhuah a nih thu te a sawi bawk.
Union Minister Irani hian nimin chawhma khan Aizawl chhunga observation home leh special home thenkhat a tlawh a ni.