India chuan khawvel sum leh pai dinhmun tha leh lian ber panganaah inhlangkaiin United Kingdom a khum hnu lawkah mi thiamte chuan kum 2030-ah chuan pathumnaah a chho thei dawn niin an sawi.
Chief Economic Advisor thin, Arvind Virmani chuan, “India hi a kâng zawngin a kal zel a, keima thlirna atang bik chuan kum 2028 – 2030 hi chuan khawvela economy lian ber pathumna a ni tawh ang,” a ti.
“A than chhoh dan hi a pawimawh a, ram dang nena kan inkungkaih dan leh kan inkawm dan hian kawngro a su thui em em a, mite min hmuh dan thlengin a nghawng a. Kum 20-30 liam taah kha chuan miin China hlat hle angin min hmu a, tunah erawh chu thlirna chu kan thlak tan mek a ni,” tiin Virmani chuan a sawi.
Tun tum hi India-in ram sum leh pai dinhmun lama UK a khum vawi hnihna a ni a, kum 2019 khan a lo khum zeuh tawh bawk.
“A vawi khatna a ni lo va, capital expenditure lamah kan insawrbing a, pawisa hmanna tur lam tihtlem tum leh RBI-in thil man sang zel do atumna kawngte hian economy chu inrualkhai taka a than theih nan a pui nasa a ni,” tiin Sachin Chaturvedi, DG, RIS (Research & Information System for Developing Countries) chuan a sawi.
India sum leh pai chu a than ve hrim hrim piah lamah UK hi an tlahniam a, mi thiam thenkhat chuan an ram inthlan nghawng niin an ngai.
“India tan thil chhuanawm tak a ni a, kan than that bakah kan eibar dinhmun ngaihtuah tel a ni a. International Monetary Fund (IMF) pawhin ‘khawvela a thang chak ber’ tiin min sawi reng a. Thil man sang pawh thunun fel tep a ni a. Hetih lai hian UK economy hi a hniam a, an che tha lo bawk a. Kum 2027-ah chuan kan san lehzual a rinawm a. Khawvel a chawlh laiin Indian economy a thang a, kan titha hle a ni. UK chhiatna hi an inthlan nghawng ni theiin ka ngai a ni,” tiin economist hriat hlawh, Charan Singh chuan a ti.
IMF chuan India hi US, China, Japan leh Germany hnuaiah dahin $ tluklehdingawn 854 hu vel niin a ngai a. Kum 10 liam taah kha chuan 11-na niin UK hi pangana a ni thung.