ROCK BAND HO NGAWIH thuap tir thei khawpa album thiltithei leh huhang ngah, ‘Nevermind’ album cover-a lang, saruaka anga thla li mi thlalak chungchangah he thlalaka langin Nirvana band laka thubuai a siam chu court-in a hnawl ta.
Kum 1991 khan ‘Nevermind’ album hi tihchhuah niin, rimawi khawvel kalphung leh lan dan sawi danglam dawrh theih khawpin a tal na chho hle a, he album cover-a lang, khatih laia thla li mi Spencer Elden chuan tunhnu lamah court-ah zual koin, a tlangval hnu hian mi zingah pawh a inkilh tawih pah a, rilru lamah harsatna tam tak a tawh pah, tiin Nirvana a khing a ni.
Zirtawpni kalta khan U. S. District Judge Fernando Olguin chuan kum tam a liam hnu chauha Nirvana-in mawi lo takin an phochhuak nia a thu put luh hi a inhmeh lova, cover-a thil awmdan a hriat hnu kum 10 liam fe hnu lama thubuai a siam hi thil inhmeh lo tak a ni, a ti.
California-a Pasadena Aquatic Center-ah 1991 khan he thla hi lak a ni aa, Nirvana hian album cover-ah an hmang a. Saruaka Eldin tui hleuh lai a lang a, dollar bill lam pana a hleuh lai a lang a ni.
‘Nevermind’ album-ah hian hla hit leh chuai thei lo, tunhnu thleng pawha thawm nei ring chhunzawm zel, ‘Smells Like Teen Spirit’ kha a awm a, khawvelpumah copy maktaduai 30 chuang hralh a ni.
Engtin chiah maw?
Nikum khan Elden hian band lakah thubuai siamin, album cover-a a lan dan kha sex lam hawia intihchhiatna leh naupang kumtling lo laka sexual abuse dik tak a ni, tiin a khing.
Kum 30 mi ni tawh hian kha thlalak vang khan rilru leh taksa lam thlengin a nghawng tha lo tak a tuar a, hlim taka nun a hmanna turah harsatna namen lo a thlen bawk niin, a sawi.
Nikum December khan Nirvana band chuan thu tling lova an ngaih thu mumal takin court-ah an thlen a, Elden-a thusawi hi chhuanlam tling a ni lo, tiin tan an khawh.
Hetih lai hian, amah hrechiangtu te chuan Eldin hian ‘Nirvana baby’ tiin a inchhuang thin hle a, a induh phah hle thin niin an sawi ve thung.
Nirvana lamin an chhanletna hi December 30, 2021 khan hmachhawn tura court-in a hriattir laiin, Elden te hi an inlan loh thung a ni.
Hei vang hian Judge Fernando M Olguin chuan thubuai hi hlin tlâk lovah a puang a, January 13 thleng awmze nei zawka kalpui tura hriattirin, hun tiam a zawh hmâa hmalakna awmze nei a awm loh chuan thubuai hi a tawp fel nghal tura ngaih a ni.