Aizawl Municipal Corporation (AMC) Enforcement Committee chuan building regulations leh thil dangte mipuiin an hman dik leh dik loh vil kawngah an khawng hle dawn tih an sawi a, hma an lak tawh chinah pawh dan loa in sa thiahtir turte pawh an awm tih an sawi.
AMC Board of Councillors-in subject panga vil tura a din, Enforcement Committee member-te chuan nimin khan AMC pisaah chanchinbumite an kawm a, an Chairman John Zosangliana Ralte chuan khawng taka hmalak zel an tum thu an sawi.
AMC Enforcement Committee chairman chuan June 13, 2022-a AMC pisa tuala an hun tan, complaint box-ah tun thlengin complaint 15 lut tawhin, chung zinga 13 chu building leh a kaihhnawihte a nih thu a sawi a, complaint lutte an bawhzuina atangin AMC hotute hnenah thurawn tum hnih an thlen tawh a, chungte chu dan bawhchhiate sum chawitira dan loa in sa te in thiahtir a nih thlangpui thu leh chung zinga pahnih tih loh chu pawm vek a nih thu a sawi a ni.
John Zosangliana Ralte chuan tuna kalphungah chuan in sak phalna leh thil danga dan anga hmalak dilte chu permit pek tawp a ni mai tih sawiin, “Hengah hian a tua-te pawh AMC, technical person, local council leh mipuiten kan tih tur theuh an ti tawk lo niin a lang,” a ti.
Building permission an pek chhuah hian techinical person-te hian drawing angin bul an tanpui ang a, a tawp thlengin mawh an phur tur a nih thu sawiin, a bul tan lai tak, ban phunna tur dik inkawhhmuh chu an hna hmasa ber leh pawimawh zinga mi a ni a, an kawhhmuh dan anga in neituten an ti duh lo a nih chuan rang takin AMC-ah an hriattir tur a nih thu leh local council-te pawhin in sa dik lo an hmuh chuan an stay vat ang a, office-ah an report tur a nih thu a sawi.
Enforcement Committee-in subject panga an vilah hian khauh tak leh khawng takin an kal dawn a, dan anga hma la lo leh dan palzutte chu hremna an hmuh ngei theih nan hmalak zel a nih tur thu a sawi bawk.
AMC Enforcement Committee member-te uaptu, AMC Deputy Mayor R Thanglura chuan Site Developement & Slope Modification Regulations, 2017 chungchang sawi bawkin, nikum October 29 atanga SDSM Regulations hman tan a nih atanga August 12 thleng khan permission 1,000 an pe chhuak tawh tih a sawi a, tun hmaa AMC din a nih hma kha chuan a huai leh mipui zah lo apiang an dingchang tih theih a ni a, tunah erawh mumal taka regulation-te neih a nih hnuah in sakte pawhin awmzia a nei ve ta nia an ngaih thu a sawi bawk a ni.
Kumin March 10 &11-a Board of Councillors thukhawmin a rel angin Enforcement Committee hian subject panga – Building Regulations, Solid Waste Management, Site developement & Slope Modification, Licencing leh Advertisement & Hoarding Regulation te chu a nihna anga kalpui a nih leh nih loh an vil thin a ni.