Arsenal ropui laia an chhuanvawr ‘Invincibles’ hnehtute bawkin tun season a an inkhelh apianga la chak vek London team an hneh nawn leh a. Manchester United lakah 3-1 in Gunners an tlawm.
Pathianni zanah Arsenal hian tun season a team tha laka an fiahna hmasa ber Old Trafford-ah an hmachhawn a. Mikel Arteta pawlten goal thum chhuahin an ngam loh an tawng a. United tan Pound maktaduai 82 man mi thar Antony chuan goal a khung.
Brazilian right winger hian halftime hma minute 10 a la awmin goal a khung a, an team in mawi taka ball inpe a Gunners tlarhnung an thiah hnuah a hmawr a bawk.
Second half-ah Arsenal in Bukayo Saka hmangin an si phurh an sut a. Inrintawkna lian tak nei a inkhel Gunners hian inkhel dahthat tuma an insiamrem dawn lai takin United in an thiam an lantir a. Fing leh rang taka ball inpe lut vatin counter-attack atangin Marcus Rashford chuan minute 66-naah an goal hnihna a khung a. Minute 75-naah an goal thumna a khung leh.
United tan captain Bruno Fernandes leh playmaker Christian Eriksen te chu an goal thum khungah an pawimawh hle a. Lehlamah Gunners in goal hmahruai Gabriel Martinelli hmangin an khung a. He goal hi Martin Odegaard foul avanga pawm loh a ni a. Hei hi an sawi zui nasa hle.
Manchester United manager Erik ten Hag chuan, “He team-ah hian rilru puthmang dik tak a awm tawh. Chesual hmasa zawkah tang mahse an insiamtha thei a, goal chhuah hmasak pawh a tho leh turin rilru lian leh huaisen tak an nei tawh a. Hei hi hma kan sawnna a ni a, mahse hmalam panna tur kan la ngah hle.” a ti.