- Zirsangkima
Changkànna hi khawiah nge a awm? Tu ta nge ni a, véng leh ramte hi tu avànga changkãng nge maw an nih hlawm le?
A chhànna chu mãwl tê a ni: Changkànna chu mi mal rilruah a awm a; kan in, kan vêl, kan bawlhhlawhbáwm, kan bual pindan, kan kekawrte zàrna thleng thlengah hian a awm a; kan véng leh kan ram ti changkãng theitu chu keimahni tho hi kan ni, tih hi.
Mi mit hmuha changkãng nih tumin tan kan la a; kan incheina te lah chu Las Vegas thuam ai paw’n a tha pawh a ni mahna; mahse, kan bual pindan a tawp si! A káwra changkàn tumin phone man to chelek kual thin mah ila, kan chawi ei dawhkàn a changkãng lo a; kan in bul hnai kawra kan bawlhhlawh paih kan hreh leh si lo! Neih thinglung-kháwngin in ropui din mah ila, kan faten AMC bawlhhlawh paih motor hnunga beh an thulh chuang si lo a! Changkàn tum hi kan tlin lo a ni e! Tum ting lo mai ang u!
Changkànna hi mi ramah a awm ngawt lo a, mi dang véng chan tùr a ni ngawt bîk hek lo. Kan duha kan tum phawt chuan, kan tã a ni thei a, kan chan a ni thei a, kan véngina kan neih ve theih a ni chiang a ni. Mahse, chumi nei tùra tan kan lâk ve chu a ngai a; mi dang phût buai hman kan nih lohzia inhriaa mahnia changkãng tùra tan lâk kan ngai a ni. ‘Thenawmte paw’n … ’ tia chhuanlam siam hman kan ni lo a; mi dang phût hi changkàn hlatna a nihzia kan zir thar a ngai a ni. Mi hlim tawngkam takin, ‘Keimahniah, kan mi mal nunah hian thleng hmasaw rawh se,’ kan tih a ngai.
Chhúngkaw chaw ei dawhkàn pawh ti fai tha hlei thei lo leh thlêng silna tawp taka enkawltu hian véng changkãnga awm tum buai duh ting suh se! Mahni bual pindan pawh ti fai hlei thei lo paw’n! Chu mi chuan ram changkãnga awm a la hlat hle tih inhre mawlh rawh se.
Bual pindana mahni chauha kan khawsa zia hian mi changkãng kan nih leh nih loh inchîk ngam a ngai a; chutiang bawkin mahnia kan zàlna khum kan enkawl dànah seven star hotel-a thleng tlâk kan nih leh nih loh pawh a lang thei ang chu! Kan lairil, mi dang hmuh ve phâk loha kan thawmhnaw hâk—kan kekawrte enkawl dàn thleng thleng paw’n mi changkãng nih hi kan tlin em?
Mizo ziak mi ka ngaihsàn berte zinga mi, Vanneihtluanga hian ‘Sex Essay’ a ziahah khan a sawi alãwm. A ziah lai khan pindan pakhatah kan thu dùn a. Ziak tha hi a inti êm êm a—a ziak tha rêng lah tak a! Engtin nge a ziah chiah kha, kei, mi nikhua lo hian ka hre leh pek ta lo—hetiang deuh hian a sawi: ‘Kan kawmkár leh kan dawr en rêng rêng hian puitling film-a inlan ngam chi kan ni lo!’ ti zawngin a ni a sawi kha!
A ni asin! Sex tape/video siam ngam khawp hian kan changkãng miau lo a; mi mit hmuha kan kàwmkár show tir ngam loho hian a show ngam hmusitin kan endawng a!
Mahni chauha kan luh thinna, kan inthiarna pindan leh kan bual pindanah changkànna bul tan ila. Chutiang zêlin, kan chokaah, kan chawhmeh hmeh duhzáwngah, kan sum lâkluh mila kan inchei duh dàn leh kan sum neiha kan phone hùm man thu-ah te; bawlhhlawh kan paih dànah leh ui kan êktírna hmunah te pawh … ‘Ka changkãng em?’ tih inzâwt zêl ta ila. Tin, hetia ka tih hian Singapore emaw London-ah emaw ka ti ang em? tih pawh inzâwl tel ta zêl ila.
Mi ram leh mi fate hi hmuh changkàn viau chi tùr an ni ngawt lo e; mihring, keimahni anpui ve tho an nia lãwm maw le! Mahse, kan harsat êm êm thinna chu—thenawmte an ni fo! ‘Anni paw’n an ti ve chuang lo a!’ tia changkàn loh ve ringawt kan chíng a! Aw … naupan têt atanga ‘Thil tha lo titute avângin intilungngai duh suh la…’ tih lo thiam bel êm êmtute hian mi dangah kan fel leh fel loh te, kan mawi leh mawi loh te, kan changkàn leh changkàn loh hi kan teh ta thin a—kan hahthlâk! Changkàn min hlattír tlat! Kan intehna tùr ber chu keimahni theuh hi kan ni asin maw le!
Mi changkãng, mahni chauha awm pawha mi changkãng nih hi duh hmasa vek ila … Chu kan duhna chu puitlin tùrin tan la theuh bawk ila, véng chhúngah bul tan ila, ram a kâng mai ang a. Keimah, ka mimal nun hi changkãng hmasa ila, chutia Zofate hian awm kan tuma tan kan lâk tlat chuan, engah nge kan ram hi a changkàn loh tehlul ang ni?