Aizawl : ZPM AMC Coordination committee thu rel bawhzuiin ZPM hruaitu ten ZPM AMC councillor paruk te ward an tlawhchhuak a, AMC atanga Councillor-te sum hmuh hrang hrang hmanga an biala hmasawnna hnathawhte an enpui.
Ward VIII – Christina Roluahpuii bial chu Zirtawpni kalta khan ZPM President Lalliansawta hovin an tlawh a. ZPM President chuan “Aizawl khawpuiin state dangte anga municipal inrelbawlna changtlung tak kan la neilo chungin, veng mawng ber thlenga ZPM Councillor-te hnathawh chhuanawm tak tak mipui ten tangkai taka an hmang tih mit ngeia ka hmu hi ka lawm hle a ni,” a ti.
ZPM Working President K Sapdanga pawhin “A pawimawh ber chu hnathawh that a ni” tiin “Kan party leh ward mipui ten mi ṭhahnemngaite councilor atana kan lo thlang hi kan tifuh takzet a, ward chhung mipuite pawh an councillor-te chungah an lawmin kan hria a, kan lawmpui” a ti bawk.
ZPM party thuchuah in a tarlan danin he project hi General Secretary pahnih Sanghnuna Hlondo leh Eddy Zosangliana Colney ten kaihruaiin, Municipalites department leh Publicity department ten a thawhkhatna atan August 24, 2022 leh September 3, 2022 inkar chhungin an zofel a. “ZPM Councillor ten an sum hmuhte ward hmasawnnan tangkai takin an hmang a; tlawmngai pawl, welfare leh veng hrang hranga party hruaitu ten hlawkna beisei lovin, tha leh zung, sum leh pai insengso hial zawka Councillor-te an thawhpuina a takin kan hmu a, ZPM General Headquarters chuan kan Councillor te tha taka thawhpuitu pawl hrang hrang te leh ward chhunga party hruaitute chungah lawmthu a sawi a ni” an ti.