Aizawl: PC Party President Lalhmangaiha Sailo chuan a nihna chawlhsanin Sr. vice president, Vanlalruata kutah mawhphurhna a hlan.
Thawhtannia a chenna in, Tuivamit-a party elected office bearer thutkhawmah PC Party president nihna a chawlh tur thu hi Lalhmangaiha Sailo hian a puang a. Kum upa lam a lo nih tak avang political party kaihhruai hna hi kum naupang zawk, la chak tha zawk leh tun lai mila ngaihtuahna hmanga hna thawk thei kuta a awm tha a tih avangin leh thangthar zawk kuta hlan a tum tak avangin a nihna atanga chawl a nih thu a sawi.
Lalhmangaiha Sailo hian sorkar hna a thawh hnuah ram siam that a duhna avangin politics zawmin, MPC Party-ah kum 10 chhung president a nih thu leh, MPC party leh PRISM party inzawmkhawma PC Party an nih hnuah kum thum hmel hmu president a ni tih a sawi a. “Political party-a ka tel leh MLA inthlante chuha ram hruaitu nih tuma ka beihnate hi kan ram leh hnam tan ka thiam leh theihna te hmanga kan ram hi hma sawnpui ka duh vang a ni a. Ka pa, Brig T Sailo-in kan ram hmasawnna tur a duante kha kan ramin a mamawh nia ka ngaih avangin tihhlawhtlin ngei ka duh tak meuh a ni,” a ti.
PC Party Sr Vice President Vanlalruata kutah an party hruai hna a hlan tih sawiin Lalhmangaiha Sailo hian, a pa hma thlirte tipuitlinga ram leh hnam hian hma a sawnpui theih ngei ringin amah leh an chhungkua zawng zawngin an thlawp zel dawn tih sawiin, an party mi leh a thawhpui zawng zawngten thlawpa pui turin a ngen nghal bawk.