Aizawl : July 21, 2022 atanga Mizoram Police Department hnuaia ruihtheihthil in a tihbuaite puala Detoxification & Rehabilitation Camping buatsaih chu nimin khan Mizoram Police Inspector General of Police (Training) Parwaiz Ahmed hoa kharna hun hman a ni.
Thenzawl-a Police Training School (PTS)-ah hian camping hi ni 45 chhung, chawlhkar ruk (6) chuang awh neihah hian PTS-a thawktu mi 15 leh Serchhip DEF atangin mi pathum, an vaiin mi 18 an lut a. Camping-a lut te hian ruihhlo an tih thinte bansanin, hlawhtling taka neih zawh a ni.
PTS Conference Hall, Thenzawl-a camping kharna inkhawmah khuallian IGP Parwaiz Ahmed chuan thu sawiin, Police zinga ruihhloa fihlim lo an awm thin chu anmahni mai bakah an chhungkuain nasa takina tuar thin a, thil pawi tak a ni tih hria a, DIG leh sorkar hotute’n thahnemngai taka ruihhlo laka an talchhuah theihna tura ruahmanna siam tihlawhtlingtu ni tura tan la zui zel turin a chah.
Camping kharna inkhawm hi PTS, Thenzawl Vice Principal Vanlalnghenga’n kaihruaiin, Camping Course Report CDI Inspector Lalthakima’n a pe a. Camping a lut aiawh te, Thenzawl Joint YMA aiawh, Serchhip District SP Stephen Lalrinawma leh PTS Principal HL Thangzuala te’n thu an sawi bawk.
Mizoram sorkar chuan Mizoram hmun hrang hranga Police hmunpui hmun riat-ah Police zinga ruihhlo laka fihlim lo te pual hian ni 45 chhung camping hi a buatsaih a, Police hnathawk lai mi 350 zet camping-ah hian an lut a ni. Nimin khan a rual veka camping kharna hun hi hman a niin, Mizoram Police hotu lian te’n hmun hrang hrangah kharna inkhawm hi an hmanpui a ni.