Aizawl: ZPM Consultant Lalhmangaiha Sailo chuan an party policy chu tute emaw anga a tha thei ang bera siam ngawt ni loin, an tihpuitlin ngei tur leh ram hnuk khawih phak a nih thu a sawi.
Thawhtannia ZPM chhung inkhawmah thu sawiin Lalhmangaiha Sailo hian an policy hmang hian ram an khaichhuak dawn tih sawiin, “Land reforms chungchangah a takin hma kan la dawn a. Agriculture leh horticulture atangin Mizoram intodelhna tur bul, a hnukah kan khaichhuak ang,” a ti.
Lalhmangaiha Sailo hian ram enkawltu hmasa leh enkawl mektu party lian pahnihten an duh ang angin an pawngsual tih a sawi a. Brig. T. Sailo-in ‘six basic needs’ a ruahman te, power lama intodelhna tur hydel project bul a tan te, Aizawl khawpui zauhna tura a hmalakte chu chhunzawm a nih loh avangin tun dinhmun hi an thleng phah tih a sawi a. “Heng party pahnihte lakah hian ram mipuiten beisei tur kan nei tawh lo; an than a kin tawh a, thang leh chuang tur an awm tawh lo,” a ti.
Mizoram mipui chhan chhuak turin ZPM a piang tih sawiin, nakkum maiah inthlanpui hunah ZPM party thangduang tak, la thang zel tur, ram mipui tan ataka hnathawk tur hi chiang takin an tling dawn niin a sawi bawk.
ZPM Adviser Khualluna Pautu kaihhruai inkhawmah hian ZPM President Lalliansawta leh Leader Lalduhoma-te an tel a ni.