China chhimthlang lam chu Thawhtanni khan magnitude 6.6-a na lirnghingin sawiin mi 21 vel an thi tih sorkar chanchinbuin a puang.
Lirnghing hi an ram sanaa chhun dar 1:00 (India-a chawhma dar 10:00) vela Sichuan province-a lei hnuai km 10 vela thuk atanga intan a ni.
Tualchhung chanchinbute chuan inbiakpawhna hrui a chat nasa a, tlang awihpang lei a tawlh a, chhiatna nasa tak a thlen niin an tar lang.
Mi maktaduai 21 zet chenna, Sichuan khawpui, Chengdu chu Covid vangin ina tawm tura tih an ni mek.
Lirnghing intanna tak hi Luding niin he khua hi tlangrama awm, Chengdu atanga chhimthlang km 226-a hla niin China Earthquake Networks Centre chuan a sawi.
Chengdu leh a bula Chongqing khawpuiah chuan in a sawi nasa hle a, kawngpui dan niin mi 10,000 vel chenna hmunah hian inbiakpawhna hrui pawh a chat nasa hle niin broadcaster CCTV chuan a tar lang.
Power station thenkhat pawh Garze leh Ya’an-ah chuan tihthih a ni tih tar lan a ni.
A intanna hmunah hian chhanchhuah hna thawktu mi 500 chuang tirh nghal an ni a, lei tawlhin kawng a hnawhte thian turin hlawhfa rawih nghal an ni tih sorkar chanchinbu, CGTN chuan a puang.
Chengdu-a inchhawng sanga chengte chuan an phone-a lirnghing inralrinna an dawn avangin chiai takin pawnah an tlanchhuak hlawm tih hmuh theih a ni.
“Mi thenkhat chu an mangang hle a, tap pawh an awm,” tiin international PR consultant Laura Luo chuan news agency Reuters a hrilh.
Lir a nghin tan hian ‘ui an bauh chuah chuah a, a rapthlak duh hle’ a ti bawk.
“Lei zawla cheng ka thenawmte chu an insawi dual dual tih a hmuh theih a ni,” tiin Chengdu-a cheng pakhat, Chen chuan AFP news agency hnenah a sawi.
“Mahse, Chengdu-a chengte hi hri leng avangin tumah pawn chhuah phal an ni lo va, an in tual vela tlan chhuak erawh an awm nual a ni,” a ti.
Chengdu hi Chinese thuneituten an khawpuia Covid kai an pun leh avangin Zirtawpni atang khan an kharkhip a ni.
June thla khan magnitude 6.1-a na lirnghingin Sichuan province hi a lo sawi tawh a. Lirnghin duhna laia awm niin khawchhak lama Qinghai-Tibetan plateau intawhna laia awm a ni.
Kum 2008 khan Sichuan hmarthlang lama Wenchuan county chu magnitude 8.0-a nain a lo sawi tawh a, mi 70,000 chuang zet thiin thil chhia pawh a tam hle.